Shillong, Jymmang 21 : Ka Khasi Hills Autonomous District Council (KHADC) kala pyni shai kdar ba ka pynkhun (bend) ia ki kyndon ain haba ioh jingmyntoi bad pyrshang ban thom ia ki bor ba kham halor da kaba pynman ialade kum ka lanot haba shah tynjuh.
Kane ka kam jong ka KHADC kala paw tyngkrein na ka jingshah khang tala ka khyrdop lum khajna ka Tnad Trade hapoh ka surok National Highway-06 ha shnong Umdihar, dang ha kine ki khyndiat sngi bala leit.
Ki bor pyniaid District ka Ri-Bhoi kila leit khang tala ia kane ka khyrdop ka KHADC halor ka nongrim ba la pynieng ia ka khlem da ioh jingbit na ki bor Sorkar bad na ka Ministry of Road Transport & National Highway (MoRTH).
Ka Executive Committee ka KHADC ba ialam da ka Voice of the People Party (VPP) kala pynman ialade kum ka lanot (victim) ha kane ka jingjia da kaba kam ba kine kiei kiei baroh kila jia namar ba ka KHADC ka dei kaba pyniaid da ka VPP katba ia ka Sorkar Jylla la pyniaid da kiwei pat ki seng sain pyrthei.
Hynrei ka klet pat ban khmih ia ki kyndon ba kala buh hi ha ka Work Order ba aiwai ia kane ka khyrdop-khamtam lei ba ka dei ka khyrdop kaba dang shu pynmih thymmai.
Kat kum ka Work Order ba 29 tarik Iaiong 2025, ka KHADC kala kren shai kdar da kaba ong ba ia ka khyrdop bad Ophis dei ban pynieng ha ka jaka kiba lait na kiei kiei baroh hynrei kim dei pat ban don ha ki surok National Highway, State Highway bad ki surok PWD Rural Roads kaba mut ki surok Shnong.
Kane ka kyndon ka mut aiu?. Hato ka khyrdop ha Umdihar kam dei kaba don ha surok National Highway? Kane kam mut mo ba ka dei ka jingpynkhun ia ki kyndon ain haba don ka jingmyntoi (ka jingioh pisa)?.
Ka KHADC kala aiwai ia kane ka khyrdop ha Umdihar sha u Pyndaplang Diengdoh uba dei na Pahamsyiem, Nongpoh.
 kala pyni shai kdar ba ka pynkhun (bend) ia ki kyndon ain haba ioh jingmyntoi bad pyrshang ban thom ia ki bor ba kham halor da kaba pynman ialade kum ka lanot haba shah tynjuh.){kind=link}