Shillong, Risaw 05: Ka seng ki nongbylla ha Mawiong Umjapung ka Domestic Worker Union hynne ka sngi Balang ka la pynkhuid ia ka wah Umshing kum shi bynta jong ka jingrakhe dap shi snem ka seng.
“Ngi la pyrkhat bad puson kaei ba ngin leh na ka bynta kane ka jingdap shisnem, hynrei khatduh ngi sngew ba ka dei ia ngi ban shim ia ka sienjam da kaba pynkhuid ia ka wah umshing kaba ngi la iohi ia ki jingjaboh jong ka wah,” ong ka kong Sngewbhalang Bamon, President ka Seng ki Nongbylla (Domestic worker Union).
Ka kong Bamon ka la ong ruh, “Nga ai khublei ia u MLA bah PT Sawkmie iba la wan jngoh ban don lang bad ngi, kumjuh ruh ia u Rangbah shnong Mawiong Umjapung.”
Ka kong Bamon ka la bynrap da kaba pynpaw ia ka jingsngewkmen ia ka jingwan ai mynsiem jong u MLA, u bym ju iehnoh bad uba iai don ryngkat barabor bad ki.
Katba na u Bah PT Sawkmie u la pynpaw ba u dap da ka jingsngewkmen ban ia don bynta lang bad ka seng ki Nongbylla ha kane ka jingrakhe dap shisnem ka jong ki.
Ha kane ka sngi la ioh ruh ia ka jingkren na u bah Anthony Kharkongngor, Rangbah Shnong ka Mawiong Umjapung uba la pynpaw ba baroh ki nongshong shnong ki pyndonkam ia ka wah umshing khamtam ki nongsait jain, kumta u kyntu jur ban sumar khuid ia ka.
