Nongstoiñ, Nailur 2: Uwei u khynnah samla u ba la tip kyrteng kum u Ardor Marbaniang 17 snem ka rta, ula shah jied ban leit mihkhmat ïa ka jylla Meghalaya sha ka lympung ïalehkai Badminton, kaba la tip kum ka North East Zone Inter State Badminton Championship 2022, ka ban long h Agartala, Tripura mynta u bnai Nailur 2022.
Une u samla u dei u khun jong ka kong Thrisfulness Marbaniang bad u bah Wanshemlin Nongbri kiba shong ba sah ha ka shnong Ladweitang Nongstoiñ West Khasi Hills District.
Une u Samla u la sdang ban ïalehkai ïa katei ka jingïalehkai, naduh ka por ba u dang dap 10 snem ei ei, da ka jinglam lynti jong kiwei. Suki pa suki hadien ba u la kham tbit u la ju ïoh ruh ban khur ïa ka nam lahduh ha ki jingïalehkai kiba la pynlong ha sor Nongstoiñ bad ha ka District ruh kumjuh.
Utei u samla hadien ba u la paw bha ha ka District u la ïoh ruh ban mihkhmat ïa ka District sha ka Meghalaya Games 2022 bad u la ïoh ban khur ïa ka Bronze medal ha ka thup Under 19 single Badminton Championship.
Mynta ka kynti u dang pynleit jingmut bha ha ka jingkilan met na ka bynta ban leit aireng sha katei ka lympung kaba dei na ka bynta ki jylla Lam mihngi.
Ha ka jingïakren bad u nongthoh khubor, utei u samla u la ïawer bad kyntu ïa ki samla ba kin pynmlien ha ki jingïalehkai bapher bapher, khnang ba kin lait na ki jingdih pynbuaid bad ba kan long ruh kum kawei na ki lad kamai ja kpoh ïa ka lawei jong lade.
U la ong lada ki samla ki sakma noh ha ki jingmlien kaba sniew shaei kan poi ka jaidbynriew, namar ngi ki samla ngi long ka lawei jong ka Ri.
