Shillong Naiwieng 27: U President ka BJP Meghalaya u Rikman G Momin hynne ka sngi nyngkong, ula pyntip ba ka BJP kala pynkhreh shaid shaid na ka bynta ka elekshon MP Lok Sabha.
Haba iakren bad ki nongthoh khubor, u Rikman ula ong ba kila don katto katne ki kyrtong kiba la wan sha ka seng ban pan ia ka tiket ban iakhun ia ka elekshon MP na Shillong bad Tura Parliamentary Constituency.
“Ia mynta ngam pat lah ban batai ia ka kyrteng jong kitei kiba la pan tiket hynrei ka BJP sengkmie kan sa pynbna iaka kyrteng jong ki kyrtong” ong u Rikman.
Ula ong, ba u Myntri Sorkar u Bah AL Hek ula pynpaw ia ka jingthrang ban iakhun ia ka elekshon MP na Shillong hynrei kan shong pat ha ki nongialam ka seng ban shim ia ka rai.
“Ka kamram ka jong nga ka long ba ngan phah ia ka kyrteng jong baroh kito kiba la pan ia ka tiket sha ka BJP Sengkmie.”
Ula pynpaw ruh ba ka seng kan pdiang sngewbha lada don kino kino ki kynthei kiba pan tiket ban iakhun ia katei ka elekshon.
“Kum ka BJP, ka long kaei kaei kaba bha shibun ia ka seng lada ka lah ban pynieng kyrtong da ki kynthei namar dang shen ia ka jngbhah 33% ia ki kynthei kadei kaba dang shu pyntreikam” ong u Momin.
U Nongialam ka BJP ula kyntait ban kren eiei halor ka rukom treikam jong u MP uba mynta na Shillong u Bah Vincent H Pala uba dei na ka seng Congress, hynrei ula pynpaw pat ia ka jingbym hun ia ka rukom treikam jong ka MP ka NPP na Tura ka Agatha K Sangma.
“Ia mynta hi, ngam tip eiei ia ka rukom treikam ka jong ka (Agatha). Ngam tharai ba kala leh bha eiei namar ki paidbah kim shym la ioh pdiang ia kino kino ki skhim na ka sorkar pdeng bad kam shym la leh eiei na ka bynta ki paidbah” ula ong.
U Momin ula ong ba ka seng BJP ka ieng pyrshah ia ki kam bamsap bad kumta ka seng kan shimkhia lada ka ioh pdiang ia kino kino ki jingujor pyrshah ia ki kam bamsap.
