Shillong Naiwieng 27: Ha ryngkat bad ka ri hi baroh kawei, hynne ka sngi Nyngkong, ki riewngeit Sikh jong ka nongbah Shillong kila rakhe ia ka lyngkhuh sngikha jong u Guru Nanak uba dei u nongseng jong ka niam Sikh.
Ka Sikh Centre Sri Guru Singh Sabha kaba don ha Shillong kala rakhe ia kane ka sngi da kaba buh jingduwai kyrpang bad lehniam lehrukom ryngkat bad ka jingaibam ne ka ‘Langar’ ia ki riewngeit Sikh.
La kha ia u Guru Nanak ha u 1469 AD ha Tolevandi (hajan Lahore) bad ha ka sngikha ka jongu la rakhe da ka jingkmen bad jingsngewbha ryngkat bad ka jinglehniam hapdeng ki riewngeit Sikh.
Ia kane ka jingrakhe la sdang naduh ka por mynstep, da kaba iaid proseshon ia kaba la tip kum ka ‘prabhat pheri’ bad kane ka jingiaid proseshon kala sdang na katei ka Gurudwara bad la iaid ha kylleng ki jaka kiba marjan, ha kaba kala don ka jing pyrta bad ka jingia rwai jong ki nongiashimbynta.
Ia ka Prabhat pheris la pynlong ha ki sngi shwa ban rakhe iaka Gurunanak Jayanti bad ha kine ki 3 sngi kala don ka jingbteng ban pule ia ka Guru Granth Sahib, naduh kaba sdang haduh kaba kut khlem kano kano ka jingshongthait.
Ha ka sngi jong kane ka jingrakhe, la pynlong ia ka jingiaid proseshon kaba kyrpang ha kaba la rah iaka Guru Granth Sahib, ha ka jaka buh kaba kyrpang bad kala don ka jingduwai bad ka jinglehniam ha ki Gurudwara bad hadien kane la pynbud pat da ka jingiabam sngewbha lang (langar), ia kaba la khot sngewbha ruh ia kiwei kiwei wat ia ki bym dei na ka niam Sikh.
