Nongstoiñ, Nailar 23: Ka seng ki Nongkhaïi Shyiap Maw West Khasi Hills District, hynne ka sngi Thohdieng, ka la pynlong ïa ka jingïalang ha Mecofed Hall Nongstoiñ, ban ïa phylliew jingmut kumno ban pyntyllun shakhmat ïa ki jingïakhih, hadien ba ka sorkar ka la pyrkhing ban tih Maw tih Shyiap ha ka thaiñ.
Kane ka kynhun hapoh ka jinglamkhmat jong u President bah Pynlangbor Nongbri bad u Mawkordor Kharsyiemlieh haba kren bad u nongthoh khubor, ki la ong ba ka seng ka pynpaw ïa ka jingsngewnguh ïa ki paidbah kiba la kyrshan ïa ka jingpynsangeh shalan maw bad shyiap ha kine ki arsngi kaba la dep.
Kila ong ba kane ka pynpaw ba ki paidbah ki ai ka jingïatreilang bad ka seng, kumta ka seng hadien ka jingïalang, ka la shim ruh ïa ka rai ba kan dang ïai bteng ïa ka jingïakhih da kaba khang ïa baroh ki Kali, ki Nongshalan Maw bad Shyiap ha ka thaiñ hi baroh kawei, tad ynda ka sorkar kan da pynbeit da kumwei pat.
Ha kajuh ka por ka seng ka la kyntu ruh ïa ka sorkar, ba kan da khmih bniah biang sa shisien pat ïa ka kyndon jong u snem 2016, lym kumta naduh mynta ka sngi, naduh ki ophis sorkar, ki riew paidbah bad kino kino kiba hap ban pyndonkam ïa u maw u shyiap, kin ym ïoh shuh haduh ban da pynbna biang da kumwei pat lyngba ka seng.
Kum ban shu pyntip ha kane ka kynhun la kynthuplang ki trai crusher, ki kali kit maw kit shyiap, ki nongñiah kali kit maw kit shyiap, ki nongkhaïi maw Nongkhaïi shyiap bad kiwei kiwei.
