Shong bishar kam u DyCM bad ka PWD bad NHIDCL
Shillong, Jymmang 10: Ka sorjamin ia ki jaka ban pynheh ia ka surok naduh Umiam sha Malidor sha ka surok 4-lane kala poi ha ki bynta kiba khatduh satang ban dep noh.
Ia kane la pyntip da u Symbud Myntri Rangbah ba khmih ia ka Tnad PWD (Roads) Bah Prestone Tynsong hadien ba pyniaid ia ka jingialang bishar kam hynne ka sngi Thohdieng.
Haba iakren bad ki nongthoh khubor, u Bah Prestone ula ong ba ka jingjrong jong kane ka surok ha ka National Highway-6 ka long hapdeng 160 haduh 170 kilometer.
Ka jingpynheh sha ka surok 4-lane kan sdang naduh ka flyover ha Umiam, Ri-Bhoi District haduh ha khappud ka Assam ha Malidor, East Jaintia Hills District.
“Ngi la don ka jingiasyllok bad shong bishar kam halor ka jingiaid ka sorjamin ia ka surok bad ki Tnad ba dei khmih lem bad ki Heh ka NHIDCL, kaba pyntreikam ia kane ka project” ula ong.
U Bah Prestone ula bthah ruh ia ki Deputy Commissioner ka East Jaintia Hills bad West Jaintia Hills ba kin thaw ia ka Committee ka ban pyntreikam ia kane ka project kaba kongsan bha.
Kane ka Committee kan don ia ki dkhot ki ban shim na ki Tnad ba dei khmih bad ki Nongmihkhmat jong ka NHIDCL.
“Ka East Khasi Hills bad ka Ri-Bhoi kila dep ban thaw ia ka Committee bad mynta nga la bthah sa ia ki DC ka West Jaintia Hills bad East Jaintia Hills ba kin thaw ia kum kane kajuh ka committee na ka bynta kane ka project, kaba long kongsan bha ia ka Jylla Meghalaya” ula ong.
Kat kum ka jingong jong u, kane ka project ka dei kaba heh bha namar ka leit shaduh sha Silchar. Ka jinglut jingsep kan kot hapdeng T.20 hajar lane T.22 hajar klur.
Haba kylli, u Symbud Myntri Rangbah ula pyntip ba kane ka project kan don haduh san song (five packages) ha Meghalaya bad ka sorjamin ia ka jaka ban pyniaid ia ka surok kala jan dep artad.
“Ka sorjamin ia ka song I,II bad III kala jan dep lut” ula ong haba bynrap ba ka don ruh ka jingtyrwa ban shna ia lai tylli ki tunnel ha kane ka surok.
Ha kajuh ka por, u Bah Prestone ula ong ba ka jingpyniaid ia ka kam thied jaka kan sa sdang noh shen. Ka jingialang ba mynta ka sngi ka long ban pynthikna ha kaban pynbeit ia ki kam ba iadei bad ki jaka puta da ki District Committee.
