Shillong, Jymmang 10: U Symbud Myntri Rangbah ka jylla Bah Prestone Tynsong hynne ka sngi Thohdieng ula ong, ba ka sorkar jylla kan iaid beit shakhmat ha ka jingthmu ban tei iaka Flyover lyngba ka Petrol Pump kaba don ha Anjalee bad ban ai jaka ia u bar jylla ban tei ia ka Petrol Pump kaba thymmai ha ka jaka sorkar kaba don ha Uper Shillong.
Kane ka jingkren u Bah Prestone kala mih halor ka jingpyrshah ki sengbhalang bad ka Synjuk ki Nongsynshar Shnong ka Upper Shillong ban ai jaka ia u bar jylla ban tei ia ka Petrol Pump M’s Ashok Auto Service ha Upper Shillong.
“Balei kim sngewthuh, lada ki kwah ioh jingshai kidei ban wan iakynduh ia nga, ka long biej kumne ban kren. Nga ong ia phi, ba ngi ruh, namar ngim lah shuh ban kiar namar ia kato ka jaka kaba don hapoh Anjalee ka dei kaba kila don iaka jingiateh kular (Agreement ) ka jongki naduh ki por mynhyndai bad lada ngim ai bujli ia ka jaka, kin ym lah ban weng bad kin ym lah ban leit sha kiwei pat ki jaka” ong u Bah Prestone.
“Hadien ba ngi la iashong pyrkhat da ki spah sien bad da ka jingiakren bad jingpyrkhat kumno ban leh. Phi ong u Dkhar ne u Khasi kata kam long kaba iahap namar ngi donkam ia kato ka jaka ban shna ia ka Flyover bad lada ka don kato ka Petrol Pump ngin ym lah ban poi shano shano” ula ong.
Ula ong, ba ka jingai jaka kam ktah satia ia kano kano ka jaka jong ki riewshimet namar ba ka sorkar kala ai jaka kumba 10,000 ne 11,000 sq ft ban ioh shna ia ka petrol pump.
“Kim dei ban sngewthuh bakla ia kane, kam mut ba ngi ai jaka ia u Dkhar, namar lada u leit sha ka aiñ ngin ym lah ban beh ia ki bad ngim banse ngi hap ban ai da kawei pat ka jaka” ong u Bah Prestone bad ka bynrap ba u trai jong ka Petrol Pump u kwah bun bha ka jaka, hynrei ka sorkar kala ai ia ka jaka hakhmat ka surokbah kumta la ai ia ka jaka da kaba pyrkhat ruh ban lait na ka jingdheng kali ne aksiden.
U Bah Prestone ula pynkut da kaba ong, ba ka sorkar kan iaid beit shakhmat halor kane ka kam.
