Shillong, Risaw 17 : Ka Sorkar Jylla kan sa wanrah shen ia ki jingpynkylla iaki kyndon (Amendment) bad thaw ia ka Rules jong ka Prevention of Illicit Traffic on Narcotics Drugs and Psychotropic Substance (PITNDPS) Act, 1988, ban pynsted ia ka jingpyn iadon bynta lem jong ki Dorbar Shnong ha ka jingiakhun pyrshah ia u droks hapoh ka Jylla.
Haba pynbna ia kane hadien ka jingialang bad ki Nongmihkhmat na ki 10 tylli ki Dorbar Shnong kiba hap hapoh ka West Shillong Constituency hynne ka sngi Ba-ar, u Myntri ka Tnad Social Welfare Bah Paul Lyngdoh ula ong ba ka kam kaba iadei bad ka jinghap leit mih ki nongai sakhi bun bun sien bad na u snem sha uwei pat hapoh ka Iingkashari ka dei kawei na ki jingeh ban pyniadon bynta lang ia ki Dorbar Shnong.
“Namar kata, ka Tnad Social Welfare bad ka Tnad Pulit kala iatrei ryngkat ban wanrah ia ki jingpynkylla kyndon kiba bun, ban thaw noh ia ka Rules jong ka PIT NDPS Act ha kata ka rukom ka ban pynkloi ia ka jingiashimbynta lang jong ki Dorbar Shnong ban iakhun ia ka jingkynrei u droks” ula ong.
Ula ong ba ia kane ka rai la shim hadien ka jingioh iaki jingai jingmut kynthup ia ki jingeh ba ki Dorbar Shnong kila iakynduh haba pyntip lane pyrshang ban iarap iaki Pulit ban kem ia ki nongkhaii droks.
U Bah Paul ula ong ba ka jingialang hynne ka sngi ka dei ruh kaba la pynlong kum ka jingpynbud iaki jingialang bala lah, kiba ula pynlong bad ki baroh ki kynhun. Ka jingialang ba khatduh ka dei kaba la pynlong bad ki seng niam.
Haba kylli, u Myntri ula pyntip ba ka East Khasi Hills ka dei kaba don bun eh ki nongdih bad nongkhaii droks bad la bud ka East Jaintia Hills bad Ri-Bhoi. “Ngi donkam ia ka jingiatreilang ki Dorbar Shnong. Khlem ka jingiatreilang jong ki, ki jingpyr shang baroh kin ym poi shano shanoruh. Ngi lah iohi ia ka jingjop ha ka jingiakhun pyrshah ia ka khlam Covid da ka jingia shimbynta lang ki Dorbar Shnong”.
Halor ki rehabilitation centre, u Myntri u pyntip ba ka Sorkar mynta kala ai jingsumar ei ia ki nongdih droks ha ki artylli ki centre ha Shillong- Kripa Foundation Deaddiction Centre bad ka KJPA New Hope Deaddiction Centre bad kine baroh artylli ki don ha Mawkasiang. Nalor kane ki don ruh ki centre ba ai jingsumar ei ha Jowai bad Nongstoin.
Ha kajuh ka por, u Myntri ula pyntip ba ka Sorkar Jylla ka don jingthmu ban buh ia ki rehabilitation centre ha manla ki shnong ki thaw.
“Ngi la don ia kane ha ka jingmut jingpyrkhat. Kaba kongsan ia ngi ka long ba ngin ioh ia ka jingkyrshan na ka Ministry kaba wan lyngba ka jingbei pisa ba 90:10 hynrei hooid, ngi don ia ka jingthmu bad don ruh ka jingsngewkhia halor ka jing bun ki nongdih droks kiba kyntait ban leit shah sumar, ta ka daw ngi la pyniadonbynta lang ia baroh ki kynhun naduh ki seng niam bad mynta sa ki nongialam shnong” ula ong.
Ha kajuh ka por, ka Tnad Pulit ka Jylla kala phah ia ka jingtyrwa ban pynmih ia ka hukum set along ia 9 tylli ki case jong ki nongdie/nongdih droks ba la kem bunsien kat kum ki kyndon ka PIT NDPS Act.
