Shillong, Risaw 17: Ka Meghalaya People’s Labour Union (MPLU) hynne ka sngi kala leit buh daka dorkhas sha u Chief Executive Member (CEM) ka Khasi Hills Autonomous District Council (KHADC) halor ka jingbym don ki bar jylla iaki Labour License ne Trading License ban sengkam bad bylla hapoh u pud u sam ka Council.
Lyngba ka dorkhas bala aiti sha u CEM ka KHADC, ka seng MPLU kala kynnoh ba kala lap bun bah ki bar jylla kiba wan seng kam khaii bad kiba wan bylla hapoh u pud u sam ka district council kim don satia ia ki kot ki sla ba biang kum ki Labour License ne Trading License.
Ka seng kala pyntip ba bun ki bar jylla kim don satia iaka Labour License ne Trading License haba sengkam lajong ne wan bylla sha ki jaka ba hap ha Bynnihat, 13 Mile bad ha baroh ka Raid Marwet jong ka Ri-Bhoi District.
Ka Union kala pyntip ruh ba ka lap ba ki bar jylla ba trei ha ki karkhana bapher bapher kim shym la don kit kot ki sla ba biang kum ha Shallang haki Coke Factory ha Borsora, Cherragaon bad Bagli jong ka West Khasi Hills bad ha Ichamati, Kalibari, Majai jong ka East Khasi Hills.
Ka MPLU kala ai jingmut ia u CEM ban iatreilang ha ka ban tehlakam bad ban talasi ia ki kot ki sla jong kine ki bar jylla kiba wan buhai ha baroh ki shnong ba hap haka jingkhmih ka District Council.
