Shillong, Nailur 16: U Myntri ka Tnad Pule Puthi Rakkam A Sangma ha ka sngi Nyngkong, ula ong ba ka Sorkar Jylla ka dang pynkhreh shaid shaid ia ki lad ki lynti (formula) ha ka ban leh eiei halor ki kam kiba iadei bad ki nonghikai SSA.
“Ngi dang pynkhreh ia ki rukom treikam bad ruh ia ka lad ka lynti ba kumno ban leh eiei halor ki kam jong ki nonghikai SSA ha kine ki sngi ban dang wan” ong u Rakkam haba iakren bad ki nongthoh khubor.
U Rakkam ula pynpaw ia kane haba jubab halor ka jingdawa jong ki Nonghikai SSA ban pynkiew noh ia ka tulop jong ki hapoh une u bnai ba mynta.
Ula ong ba ka jingdawa ki nonghikai SSA ka dei kaba shonghok bad ka Sorkar kala pyrshang kat kaba lah ban pynbiang tarajur ia ka. “Ngi kyrpad ia ki ban long kiba iai shah ( bad ka Sorkar)” ula bynrap.
U Myntri ula pyntip ba ha ki por bala leit noh, ka rukom ioh song pisa jong ka song tulop SSA ka long 90:10 bad mynta ka Sorkar kala kyntiew ia ka 5% manla u snem ia ka song tulop jong ki nonghikai SSA haba bynrap ba mynta ka song tulop ka long 30:70 bad lashem snem kan kot 35:65.
“Ngi la kyntiew 5% manla u snem iaka song tulop jong ki nonghikai SSA hynrei ka jingsiew pat kam shym la iaid satia. Balei?. Namar ka Sorkar India kala nang khate 5% manla u snem ia ka song tulop jong ki nonghikai SSA” ula ong haba aiksan ba “Lehse ha ki 3-4 snem ka lah ban kot 50:50, kaba mut 50% yn hap pynlut ka Sorkar bad 50% yn pynlut da ka Sorkar Pdeng. Kumta haba kut jong ka sngi, lehse ka Sorkar Pdeng ka thmu ban aiti beit noh sha ka Sorkar Jylla. Ngi tip ia ki jingtynjuh bad ka Sorkar kala nang pynkhreh bad wad ia ki rukom treikam bad ki lad ki lynti kumno ban shimti noh ia ki nonghikai bad kumno ban leh ia ki jingeh kiban mih”.
Halor ka jingdon ki skul SSA bym don khynnah, u Myntri ula pyntip ba la bthah ia ka Fact Finding Committee ba kan leit jurip ia man ki skul ban sngewthuh ia ki jingeh bala iakynduh da kine ki skul.
“Ngi sngewthuh ba ki don bun ki skul ki bym don khynnah satia. Ki don bun ki skul kaba ki nonghikai kim ju leit satia sha skul. Ki don bun ki skul da ki nonghikai ba thung bujli da ki nonghikai hi (proxy). Ki don bun ki skul ba tang hapoh 10 ngut ki Khynnah. Ki don bun ki skul ki bym don iingskul. Ki don bun ki skul kiba don bun ki nong hikai ia ki khynnah. Ki don bun ki skul kiba don 4 ngut ki nonghikai bad tang 2 ngut ki khynnah. Kumta ngi la phah ia ka Fact Finding Committee bad ngin sa ioh ia ki jingtip ba bniah shaphang ki nonghikai bad ki skul. Ha kajuh ka por, ngi dang pynkhreh shaid shaid ia ki lynti ba kumno ngin shimti noh ia ki nonghikai la ki dei ki SSA< Adhoc, Deficit namar ngi dei na kajuh ka longiing”.
Haba pynpaw ba ka Meghalaya ka dei kaba don bun eh ki khynnah kiba pep skul shiteng por hapoh ka Ri bad kaba hatrai duh ha ka PGI rating, u Myntri ula ong ba kane ka dei kaba don jingiadei bad ka jingai jingshakri jong ki nonghikai.
“Ka rukom long ka pule dangle hangne khamtam ha ki Lower Primary ka dang duna bha. Ngi pynshlur ia ki (Nong hikai) ba kin pynleit jingmut ha ki kam jong ki bad ki dei ban ai ia ka jinghikai kaba janai bad ka Sorkar ka dang peit ia ki lad ki lynti ia kaei kaba ka lah ban leh. Ngi la iashong jingialang bad u Myntri Rangbah bad u Myntri Rangbah ula bthah ia ka Tnad ban ai ia ki jingbatai kiba bniah shwa ba ngin jam shakhmat” ula pyntip.
Nalor kane, u Myntri ula pyntip ba ka Tnad kan sa leh eiei pyrshah ia kito ki nonghikai, kiba bynshet ia ka kam jong ki sha kiwei pat ki briew.
“Lada ngi ioh pdiang ia ka jingujor na kino kino ki briew, ka ain kan shim ia la ka jong ka lynti. Ka Tnad kan leh eiei beit pyr shah ia kine ki nonghikai” ula ong haba bynrap “Lada phim wan sha skul, ka mut phim don mon ban hikai, kan bhah ba phin iehnohkam bad trei ia kiwei pat ki kam”.
 ha ka ban leh eiei halor ki kam kiba iadei bad ki nonghikai SSA.){kind=link}