Shillong, Risaw 18 : Ka Sorkar Jylla kala rai ban sa wanrah shen da ka Ain ha kaban pyntreikam ia ka Private Medical College ba nyngkong ha Jylla-ka PA Sangma International Medical College jong ka University of Science & Technology, Meghalaya (USTM).
Ia kane ka ai la shim da ka Kynhun Myntri kaba la shong jingialang hynne ka sngi Thohdieng bad kaba la pyniaid hi da u Myntri Rangbah ka Jylla Conrad K Sangma.
“Ka Kynhun Myntri kala rai ba kan ym lah ban shah ia ka USTM ba kan treikam khlem ka Ain kaba thikna namar la aibor ha ngi kum ka Sorkar Jylla ban peit ia ka jingai ia ki seat, ka bai klas bad kumta ngi la rai ba ka Kynhun Myntri kan sa shong biang hadien ba ka Tnad ka Koit ka Khiah kala wanrah ia ka plan na ka bynta ka Ain” ong ka Myntri ka Koit ka Khiah Kong Ampareen Lyngdoh haba iakren bad ki nongthoh khubor hadien ka jingialang.
Kat kum ka jingong jong ka, ka Kynhun Myntri ka lah ban iakynduh biang ha ka sngi Balang jong ka taiew ban wan.
Ka Kong Ampareen kala pyntip ba ka Tnad kan pyrshang kat kaba lah ban pyndep ia ki kam baroh hapoh ka taiew ba kut jong u bnai Risaw, kaba dei ruh ka por ba hap sdang ia baroh ki klas Medical.
Haba kylli, ka Myntri kala ong “Namar kata, ngi hap ban pynbeit ia ka nongrim jong ngi. Ki don ki hukum ka Iingkashari Supreme Court ba aibor ia ka Jylla ban wanrah ia ka Ain khnang ba kan nym don ka jingsngewthuh bakla wat ha ka jingai ia ki seat, ka bai klas jong ki samla pule bad kiwei kiiwei. Kumta, ngin sa wanrah da ka ain bad ngin sa pynsted ia kane ka kam”.
“Lada donkam, ngin hap ban wanrah ia ka Ordinance khnang ba ngin iaid kat kum ka ain ha kaban pyntreikam ia ka Medical College ka USTM” kala bynrap.
