Shillong, Lber 11 : U Myntri Rangbah ka Jylla Conrad K Sangma ha ka sngi Ba-ar ula iathuh ha Iingdorbar ba ka Sorkar kala shim ia ki sienjam ban tem bad pynduna ia ki jingpynjulor jong ki jingjia shlei um na ka jingther u lapbah hapoh ka Jylla.
Kat kum ka jingong jong u, ka Sorkar ka dang pynkhreh mynta ia ki kor ki bor ban batai lypa ia ka suinbneng ba pyndonkam lang ia ki kor ka juk ki ban lah ban batai lypa ia kano kano ka jingshlei um kaba shyrkhei lane ka jingther u lapbah.
Ha ka jubab bynrap hapoh ka kynta kylli jingkylli, u Conrad ula ong “Ngi la shim bun ki sienjam. Hangno hangno ba ngi lah ban shim ia ki sienjam la ka long lyngba ka tnad Water Resource lane ka Tnad Soil and Conservation lane ka Tnad Khlaw, la shim ia ki lad bapher bapher ha kylleng ki jaka, hooid, kine kim long pura 100 na ka 100 ba lah ban iada namar ka suin bneng ha kine ki sngi ka long ka bym lah ban batai ne tip”.
“Hynrei ki jingpyrshang kiba bun ki dang ïaid shakhmat bad kaba kham kongsan ngi dang pynkhreh mynta ia ki kor ki bor ban batai lypa ia ka suinbneng bala pyndonkam lang ia ki dur satellite bad kiwei kiwei ki buit thymmai kiba don bad halor kine, ngi lapyrshang ruh ba pynthikna ban gin lah ban batai lypa ia kano kano ka jingwan lynshop ka jingshlei um lane ka jingthep u lapbah ba lah ban jia hynrei ngi lah ban nym long 100 na ka 100 tangba da ki kor ka juk mynta, ngin don ha u pud ba la kumno kumo ngin ioh ia ki jingmaham lypa ha kiba bun ki khep” ula ong.
Nalor kane, u Myntri Rangbah ula pyntip ba ka Disaster Response Fund ka long T.322 klur bad ka Disaster Mitigation Fund ka long T. 81 klur ha kine ki san snem bala leit noh.
“Tang ha u snem bala leit noh, ka Sorkar kala pynlut haduh T.71 klur na ka T. 322 klur ka DRF na ka bynta ki thain kiba shah ktah ha ki jinglynshop ki bor ka mariang” ula ong.
Haba pyntip ba ia ka song pisa la buh ruh ha ki District, u Conrad ula ong “Ngi la pynkylla ia ki rules bad mynta ngi la shah ia ki DC ruh ba kin ai ia ki jingiarap kum ki tiar iing lada donkam sha ki longiing kiba shah ktah bad ka song pisa la buh mynta bad ki DC. Ia kane la leh namar ngi iohi ia ka jingwan jong ki paidbah kiba donkam mar mar ia ki jingiarap ban shna pat ia ki iing ba julor bad katba kin ioh ia ki jingiarap ne jingmang pisa, kala poi sha ka hynriew bnai haduh shisnem”.
“Kumta, nalor ki jingai jingiarap pisa bala don bad ki DC, ngi la buh ruh ia ka song pisa ba T.25 lak ha kaba ki DC ki lah ban pyndonkam khlem da ap ia ka jingmynjur na ka Tnad lane ka Sorkar ban sam ia ki CGI sheet sha ki Longiing ba shah ktah, kaba mynta kala long ka jingiarap kaba khraw bha” ula ong.
Haba jubab shuwa kane, u Myntri ka Tnad Revenue & Disaster Management Bah Kyrmen Shylla ula pyntip ba ki don haduh 28 tylli ki Longiing kiba hap hapoh ka Dadenggre Block kila ioh jingiarap ha ka jingshlei um ba jia mynshem snem.
