Shillong, Nailur 19 : U Symbud Myntri Rangbah ka Tnad Urban Affairs Bah Sniawbhalang Dhar ula kular ba ka Sorkar Jylla ka angnud ban pyndep noh ha ka ban pynkynriah ia baroh ki nongshong dukan madan na ka thain Contonment bad Laitumkhrah hapoh u Nohprah.
Haba kren sha ki nongthoh khubor, u Bah Sniawbha ula ong ba kumba leh ha Khyndailad, ki nong shong dukan ha kine ki artylli ki jaka ruh kin sa shah pynkynriah noh ha ka wat kaba ar jong kane ka kam.
“Ngi dang pynkhreh ia ki jingdonkam. Nga tharai ngi dei ban lah ha kaban pyndep ia ka jingpynkynriah ia ki hapoh u Nohprah” ula ong haba pyntip ba ka Tnad bad ka Shillong Municipal Board (SMB) kala sdang ia ka kam ban ithuh ia ki jaka na ka bynta ban pynkynriah ia ki nongshong dukan madan.
Ha ka 29 tarik Nailar, ka Iingkashari Meghalaya High Court kala bthah ia ka SMB ban kan leit survey bniah bha bad ban aiti ia ka jingkhein ia ka jingdon ki nongshong dukan madan kiba buh dukan ha Laitumkhrah bad ban pynthikna ba ym dei ban shah ia ka jingmih tam ki nongshongdukan madan thymmai ba khaii ha ka thain.
Ka SMB kala aiti ia ka kaiphod ba pynpaw ba ki don bun ngut ki nongshong dukan madan ha ka thain ki bym don satia ia ki licence shong dukan madan.
Ki don 122 ngut ki nongshong dukan madan ba buh dukan ha ka thain Laitumkhrah khlem ka licence ia kaba 22 ngut la shem ba ki don hok kat kum ki kyndon jong ka scheme.
Kat kum ka jingong ka SMB, haduh 48 ngut ki nongshong dukan madan ba mih tam, kila kam ba ki dei ki nongshong dukan madan.
