Shillong, Naitung 30: Ban pynthikna ia ka jingiaid beit iaid ryntih ka jingplie ia ka 133 Durand Cup 2024 ha ka 2 tarik Nailar, u Superintendent of Police (SP) East Khasi Hills u la pynbna ba la pyntreikam ia ki jingpynbeit ba kyrpang ban iaid ki kali ha ka nongbah.
Kat kum kane ka jingpynbeit iaid kali, yn shah ban rung na Lumjingshai Junction sha ka CRPF Junction bad na Lumjingshai Junction sha Forest Colony. Ia ki kali yn pyniaid sha ka thain Lawmali- Iew Polo, da kaba shim ia ka lynti kaba sha ka diang.
U SP u la kyntu ba ym dei ban pynieng kali ha kylleng ka thain Polo ha ka 2 tarik Nailar naduh ka por 11:00 AM haduh ban da kut kane ka jingïalang. Yn khang ruh ban pynieng kali ha rud surok naduh Golf Club haduh CRPF Junction.
La kyntu ïa ki paidbah ba kim dei ban pynieng ïa ki kali ha kitei ki jaka khnang ban lait na ka jingkhapngiah.
Nalor kata, la pyrkhing ruh ïa ka jingïaid jong ki kali heh ba kit mar ha kylleng ka thaiñ Polo ha ka sngi pynlong ïa ka jingïalang.
U SP u la ai jingmut ia ki paidbah ba kin pyndonkam daki kali kamai ha ka jaka jong ki kali shimet ban wan sha katei ka jingialang. Hynrei u SP u la pynthikna ba tang ia ki kali kiba don ia ki pass bad ki jingshakri ba kyrkieh yn shah ban iaid.
