Shillong, Naitung 12 : Ka Shillong kan wanrah lang ia ki nongthaw policy kiba radbah ka Ri bad ki nongsynshar ha ka taiew ban wan ha ka National Conference ba arsngi jong ka Department of Administrative Reforms nad Public Grievances bad ka Sorkar Meghalaya kaba la pynlong halor ka phang “NextGen Administrative & e-Gov Reforms”.
Kane ka National Conference kan long ha ka 13 bad 14 tarik Naitung bad yn plie ia ka da u Myntri ka Sorkar Pdeng Dr Jitendra Singh bad u Myntri Rangbah ka Jylla Conrad K Sangma.
Palat 300 ngut ki Heh Ophisar na ka Sorkar Pdeng bad Jylla, ki District Collector, ki stad kot bad ki briew ba bat ia ka bor synshar khadar kin wan ban iashimbynta.
Ka jingiakren kan long eh halor kumno ki technology bad ki buit pyniaid kam ba thymmai ki lah ban ai ka jingshakri ba kham sted sha u paidbah, kaba kham shai bad kaba kham don ka jingkitkhlieh.
Ia ka conference yn plie da ka jingai jingbatai ka Meghalaya iala ki jingpynkylla ia ka rukom treikam kiba buh hakhmat ia u paidbah bad yn pynbud ia ka jingpyni ia ki prokram bala ioh ia ka khusnam na u Myntri Rangbah Duh naduh u snem 2023 bad 2024 kaba wanrah ia u soh ka jingjop ha ka roi ka par ki district, ka pule dangle, ka kamai kajih ki nongkyndong bad ki prokram jong ka Aspirational District.
Kan don ruh ka bynta ba kyrpang ka ban iakren ia ki nongjop jong ka National Awards halor ka e-Governance 2026, ki ban pyni ia ki digital project na ki Ministry, ka Sorkar Jylla, ki Public Institution bad kiwei kiwei.
Kane ka kynthup ia ki application ba dang mih ha ka synshar khadar ha jaka sor, ka koit ka khiah, ka digital banking, ka jingpyniaid ia ka jingiaid pilgrim, ka Panchayati Raj, jingiada ia ki nongthied nongpet bad ka cyber security.
Namar ka jaka ba pynlong ia ka conference, ka jingpynleit jingmut ba kyrpang kan long ia ka thain Shatei Lam Mihngi.
Kan don ruh ka bynta halor ki kam ban wanrah jingkylla bala lamkhmat da ka Ministry of DoNER bad North Eastern Council (NEC) ha ki kam kum ka jingpynmih mar na ki siej bad agarwood, ka kam jngohkai, ki jingtei hapoh ka thain bad ka jingpeitthuh ia ki project.
