Imphal, July 12: Ka National People’s Party (NPP), Manipur State Unit, ha ka Sngi u Blei, kala pynrem jur ia ka jinghiar thma da kaba wiang ding ia ki iing ha ka shnong Kanto Sabal kaba don hajan ka Leimakhong Army Camp ha Imphal West bad ong ba kane ka jingthombor ka dei ka jingktah jur ia ka shongsuk shongsain.
Ha ka kyrwoh na u Dr. Lorho S. Pfoze, ula kynnoh ba ki iing ki sem ha ki shnong jong ki Meitei la suba jur ba kila shah wiangding ha ka kynhun kieng atiar Kuki ha ka Sngi Saitjain. Ka NPP kala pynpaw ia ka jingsngewkhia ia katei ka jingjia kaba la jia ha ka por mysngi mynshai bad kadei ruh kaba don marjan bha bad ka ktem ki shipai, kaba la pynmih ia ki jingkylli shaphang ka jingshngain jong ki nongshong shnong kiba sah ha katei ka thain.
Da kaba kam ba katei ka jingthombor kala pynkylla long ia kiba bun ki longiing longsem ban duh noh ia ki iingsah ki jongki bad ki iing kila shah pynjulor lut. Ka NPP kala ong ba kum kine ki jingjia kidei kiba iuhroit ia ka jingpyrshang ban pynneh biang ia ka shongsuk shongsain kumba ju long bad kan wanrah biang ia ka jingiaumsnam kaba kane ka jylla kala shah ktah jur bha.
Ka NPP kala kyntu ia ka Sorkar Jylla bad Sorkar Pdeng ryngkat bad ia ki bor shipai ban ai jingiarap bad jaka sah mardor ia kitei ki longiing kiba la shem lanot, ban pynlong ia ka jingtohkit ban ithuh bad ban pynshitom da kaba tyngeh ia ki nongleh ia katei ka kam runar bad ruh ban pynkhlain ia ki lad ai jingiada ha kitei ki shnong kiba la shah ktah ban tehlakam ba kan ym don shuh kum kitei ki jingjia ha ki por ban wan.
Ka seng kala pynpaw ruh ia ka jingsngewlem sha ki nongshong shnong jong ka Kanto Sabal bad kala kyntu ia baroh ki jaidbynriew ba kin kyntait ia ka kam iaumsnam hynrei ban iatreilang na ka bynta ban ioh ia ka jingsuk bad jingshngain kaban neh shi rta ha Manipur.
Kane ka kyrwoh, kala wan tang shi sngi hadien ba kala mih biang ka jingiakynad ha ka thain Kanto Sabal, ha kaba ki iing kiba la shu ieh kila shah wiang ding, kaba la pynlong ban buh mardor ia ki bor shipai bad pulit bad la kem ruh ia ki 2 ngut kiba donkti halor katei ka jingjia.
, Manipur State Unit, ha ka Sngi u Blei, kala pynrem jur ia ka jinghiar thma da kaba wiang ding ia ki iing ha ka shnong Kanto Sabal kaba don hajan ka Leimakhong Army Camp ha Imphal West bad ong ba kane ka jingthombor ka dei ka jingktah jur ia ka shongsuk shongsain.){kind=link}