Shillong, Naitung 11: Ka Nongbah Shillong kala pynkhreh ban pynlong ia ka Durand Cup, ha kaba yn pynlong ia 6 tylli ki jingiakhun ha ka jylla bad ia ka jingsdang ia kane ka jingiakhun kan long ha ka 2 tarik u Nailar.
Ka sorkar jylla hynne ka sngi Palei kala lum ia ka jingialang bad ki heh shipai ban pynbeit ryntih ia ka rukom treikam ban pynlong ia ka 133rd Durand Cup.
Nalor ka nongbah Shillong, ia kiwei pat ki jingiakhun yn pynlong ha Kolkata, Kokrajhar (Assam) bad ha Jamshedpur (Jharkhand).
Katei ka jingiakob kan long ha Jawaharlal Nehru Stadium, ia kaba mynta ka dang don hapdeng ka jingmaramot ha kaba yn pynialehkai ha madan kaba mih phlang.
Ka Mohun Bagan kadei kaba bat ia ka nam lahduh ha katei ka lympung iakob da kaba pynrem iaka East Bengal ha u snem bala dep.
Haba iakren bad ki nongthoh khubor, u Dr Vijay Kumar uba long u Commissioner & Secretary ka Meghalaya, ula pynthikna ba ka jingmaramot kan iaid shakhmat bad ban pynthikna ba ka Stadium kan long kaba la bit la biang hashwa ban sdang ka jingiakob.
Ula pyntip ba u General jongka Indian Army, u General Malik ula iaroh ia ka jingshimkhia ryngkat bad ka jingiohi jngai ba ka JN Stadium kan dei ka madan ialehkai kaba bha tam ha ka thai shatei lam mihngi jong ka ri hadien bala dep ban maramot bad ban pynbha ia ka.
Kin don 4 tylli ki kynhun kiban iakhun ha ka nongbah Shillong, kiban kynthup ia ka Shillong Lajong FC, Goa FC, Hyderabad FC bad ka kynhun jongka ri Nepal kiban iakhun ha ka Group Stage.
U Dr. Vijay ula ong hadien ka jingmaramot bad jingshna pynbha iaka JN Stadium kan don ia ka jaka shong na ka bynta 90,000 ngut ki nongpeitkai.
Haba kaba iadei bad ka rukom pynkhreh, u Dr. Vijay ula ong ba kala iaid shakhmat bha, ha kaba la shim ia ki lad ban peit ia ka jingdheng kali bad la iakren ia kane bad ka tnad pulit ban pynthikna ba ki kali kin iaid ryntih ha ka por ba ka don katei ka jingiakob.
Ha kaba iadei bad ka jingjia kaba dang shen ha kaba ka kynhun sengbhalang kila khynra ia ka Labour License bad Work Permit ia ki nongbylla kiba dang shna pynbha iaka JN Stadium, u Dr. Vijay ula kyntait ban kren eiei halor katei ka bynta hynrei ula pynpaw pat ba kala don ka jingiakren bad ki nongbylla ba kine ki 10 sngi kiban wan ki long kiba kongsan bha na ka bynta ban pyndep ia ki kam maramot.
U Dr. Vijay ula pyntip ruh bal ah jan dep lut ki kam ban maramot bad kaba sah mynta kadei sa tang ia ki bynta kiba khatduh.
