Nongstoin, Naitung 11 : Kawei ka samla lud ba 15 snem ka rta, ka bym iohsngew bad bym lait kren na West Khasi Hills, kala shah jied ban leit mihkhmat sha ka lumpung ialehkai ‘World Arm Wrestling Championship, 2024’ ka ban long ha dewbah Europe.
Kane ka samla lud ka dei kaba tip kyrteng ka samla Aisilda Thabah, khun u Bah Phrangstar Nongsiej bad Kong Colita Thabah, kiba dei na Mawphansien bad kiba shong ba sah ha Pyndengrei, Nongstoin, West Khasi Hills District.
Kane ka lympung ‘World Arm Wrestling Championship 2024, kan long ha u bnai Nailar hapoh ka Ri Maldova.
Lah ban kdew, ka samla Aisilda kala wanrah nam ia ka Jylla ha ki lympung iakhun kti ha kylleng ki jaka bad dang shen kala ioh rah ia ka nam jop ha ka National Arm Wrestling bad Para Arm Wrestling Championship 2024 kaba long ha Nagpur, Maharashtra. Kane ka lympung ialehkai ka dei kaba dang shu kut ha ka 10 tarik Jylliew, 2024.
Kane ka jingjop jong ka ha kane ka lympung, kala pynlong ia ka Meghalaya Arm Wrestling Association (MAWA) ba kan jied ha kaban leit mihkhmat sha ka World Arm Wrestling Championship ha Maldova.
Haba iakynduh markhmat bad ka samla Aisilda, kala pynpaw ba kala shem jingeh shibun ia ka Iing ba kin phah iala ka khun sha katei ka lympung kaba heh namar ka jinglut jingsep kaba bun nalor ba kam dei kaba wan na ka longiing kaba biang ha ka ioh ka kot.
Kala pynpaw ba na ki jingtip ba ioh, ka bai leit bai wan kan kot sha ka T.2.50 lak.
Kane ka samla kala kyrpad ia ki riew paidbah ba kin noh synniang lem sha ka lyngba ka gpay No. 93628 34190.
Kumjuh ruh u President ka West Khasi Hills Arm Wrestling Association (WKHAWA) Bah Aibanlumlang Marngar ula pyntip ba kum ka Association hi kam kotbor satia ban pynlut na ka bynta ka samla Aisilda bad kumta kala kyrpad ia ki bor kiba halor bad ki paidbah ba kin ailem ia ka jingkyrshan.
