Shillong, Jymmang 07 : Ka Jylla Meghalaya kala pynkhreh lut nadong hadong naka bynta ka mock drill ban iada ia ki paidbah bad ki shnong ki thaw (civil defence) kaba thmu ban pynsngewthuh ia ki nongshongshnong bd ki nongtrei halor ki kyndon jingiada ha ka por ba hiar thma ki liengsuin.
Kane ka jingpynkhreh ka long kaba kongsan khamtam hadien ba ki shipai India kila sdang ia ka jinghiar thma bala ai kyrteng ka “Operation Sindoor” pyrshah ia ki ktem jong ki kynhun lehnoh ha Pakistan bad ka Pakistan Occupied Jammu & Kashmir (POK), ki jaka kiba ki lehnoh ki ju iasuhbuit bad bthah ban wan hiarthma ia ka India.
Haba iakren bad ki lad pathai khubor, u Joint Director ka Civil Defence & Homeguards MK Sangma ula ong “Kane ka mock drills kan sdang ha ka por 4 baje janmiet bad ha ka por 6:30 janmiet, ngin sa pynsawa ia ka siren bad ka jingpynlip bording”.
Ula ong ba namar ki jingeh na ki kor ki bor, ka Meghalaya Energy Corporation Limited (MeECL) kala kyrpad ban pynlip bording tang ha Shillong, Jowai bad Tura.
U Sangma ula pyntip ba ka jingpynsawa ia ka siren kan long ha baroh ki District, kiba la dep ban pyndait ia ka kor sawa.
“Ngi don 12 District hynrei ngim pat lah ban pyndait siren ha baroh ki district namar ki don katto katne ki bym pat pyn hap kyrdan satia. Na ki 12 tylli, 7 tylli ki dei kiba la pynhap kyrdan bad 5 tylli ki bym pat pynhap kyrdan ban pyndait siren” ula ong haba bynrap “Ngin pynsangeh ia ki siren ha ki ar bynta-kawei ka siren ka jingmaham. Kan don ka jingsawa baar minit bad yn pynbud da ka jingpynlip bording ba arminit bad ynda la kut ka por pynlip bording, ngin sa pynsawa biang ia ka siren-Kawei ka jingsawa ka ban neh shi minit lynter, kaba mut ka dei jingpynsawa bala shngain bad ka mut ruh ba phi la shngain ban iamih”.
Halor ka bynta jong ki kynhun bapher bapher ha ka por mock drills, u Sangma ula ong ba ki shipai Air Force kin khanglad ia ki jingma na ka jingwan hiar thma ki liengsuin bad kin pyntip sha ka Regional Civil Defence Control Centre (RCDCC) lyngba ka hotline/radio. Ka RCDCC kan pyntip sha ki paidbah da kaba pynsawa ia ka siren ban phah ia ki jingtip sha ki District Civil Defence Control Centre (DCDCC) lyngba ka hotline/radio. Ka RCDCC kan pyntip ruh sha ki shipai bad ki katto katne ki VVIP bala jied lyngba ka line/radio.
Ka DCDCC kan pynsawa ia ka siren halor ka jingioh ia ka jingtip na ka RCDCC bad pyntip ruh sha ki bor District bad ki Warden, kiba la don ha manla ki shnong ka Nongbah Shillong, Tura bad Jowai.
U iathuh ba ka Tnad Fire & Emergency Service kan shimkhia ban leh eiei lada don kano kano ka jingpluh ha baroh ki District.
Yn pyntreikam ruh ia ka State Disaster Response Force (SDRF) bad Quick Response Team (QRT) ka Civil Defence and Homeguards haba don kino kino ki jingjia bad ban pynkynriah ia ki briew ba mynsaw na ki jingtei. La aibor ia ki Deputy Controller ba kin jied ia ki jaka bad ki jait jingjia ha ka kyrdan jong ki.
Nalor kane, u Joint Director un pynbna ruh ba ka Civil Defence & Homeguard kin pynlong ia ka bynta kaba ar jong ka mock drill ha kaban pynkheh khambha ia ki nongshongshnong bad ki bor treikam ka Sorkar Jylla.
“Ha ka bynta kaba ar, ngin sa don ia ka mock drill ba pura ka ban kynthup lang ia ki Pulit, Fire Service, PWD, Medical-baroh ki kynhun kin iadonbynta lang” ula bynrap.
Ki jingbthah kiba kongsan halor ka mock drill ba hiar thma ki liengsuin:
La kyrpad ia baroh ki nongshong shnong ba kin sngewbha ban buh jingkynmaw bad bud ryntih ia kine ki jingbthah harum ha kaba iadei bad ka mock drill halor ki lad jingïada na ka jinghiar thma ki liengsuiñ:-
1. (Ki Jingmaham : Ka jingwan hiar thma ki liengsuiñ) Ha ka por 6:28 PM ka siren sawa kumba 2 minit ban maham ia ki nongshong shnong ia ki jingwan hiar thma ki liengsuin. La kyrpad ia ki nongshong shnong ban rung shapoh iing bad wad jaka rieh na ka bynta ka jingshngain.
2. Ha ka por 6:30 PM yn sdang ka Blackout (pynlip shipor ia ka bording) kaban neh haduh 2 minit. La kyrpad ia ki paidbah ba kin pynlip ia ki inverter na ka bynta 2 minit. Ka jingleit jingwan jong ki kali kan ym shah ktah bad ki iaid kumba ju long.
3. (Ki liengsuin kila iaid lait ) Ha ka por 6:32 PM yn pynsawa biang ia ka siren kaba 1 minit, kaba pynpaw ba ka jinghiar thma ki liengsuin kala kut bad ka Black Out ruh kan pynkut noh. Kane ka mut ruh ia ka jingkut jong ka Mock Exercise halor ki jingiada na ka jingwan hiar thma ki liengsuin.
 kaba thmu ban pynsngewthuh ia ki nongshongshnong bd ki nongtrei halor ki kyndon jingiada ha ka por ba hiar thma ki liengsuin.){kind=link}