Shillong, Nailur 20: Ka Meghalaya Cricket Association kan pynlong ia ka 1st Senior Women’s Interstate Friendship Tournament, hapoh ka North East Cricket Development Council, ha Nongkhrah, Ri-Bhoi, naduh ka 30 tarik u Nailur 2024.
Kane ka jingialehkai Cricket T20 Tournament kan kynthup ia ki 6 tylli ki jylla jongka NECDC kiba kynthup ia ka jylla Arunachal Pradesh, Manipur, Meghalaya, Mizoram, Nagaland bad Sikkim.
Katba ka Nagaland Cricket Association kan pynlong ia ka 2nd Senior Men’s Interstate Friendship Tournament, kaban pynialehkai ha ki 50 Over kaba dei ka One Day.
Ka NECDC kadei ka kynhun kaba pyniaid beit pyniaid ryntih iaka jingkyntiew iaka jingialehkai cricket ha ki 6 tylli ki jylla da ka lynti jongka jingiatylli.
U nongseng jong ka NECDC uba dei ruh u Co-Convenor u Nababrata Bhattacharjee ula pyntip hynne ka sngi Thohdieng ba ka Men’s Tournament kan sdang naduh ka 23 haduh ka 28 tarik u Nailur bad yn pynialehaki ha ki ar tylli ki madan ialehkai ha Nagaland Cricket Stadium bad Sovima Cricket Ground.
Ia ka jingiakhun ia ka Women’s Tournament yn pynlong ha ka madan ialehkai kaba thymmai jong ka Meghalaya Cricket Association, ha Pahamsning, Nongkhrah, Ri-Bhoi District naduh ka 30 tarik u Nailur haduh ka 4 tarik u Risaw.
Baroh ar tylli kitei ki Tournaments ki long da ka jingthmu ban long kum ki jingiakhun na ka bynta kajingpynkhreh jong ki kynhun ialehkai Cricket jong ki jylla hashwa ba kin leit iashimbynta ha ki lympung iakob ialehkai kiban pynlong da ka BCCI 2024-25 kiban sdang naduh u bnai Risaw.
Ha ka Men’s Tournament, ka Nagaland, Sikkim bad Mizoram kin don ha ka Group A, katba ha ka Group B ki kynthup ia ka Meghalaya, Manipur bad ka Arunachal Pradesh.
Ha ka Women’s Tournament, ka Meghalaya, Arunachal Pradesh bad Manipur ki don ha ka Group A, katba ka Nagaland, Mizoram bad Sikkim ki don ha ka Group B.
