Shillong Nohprah 11: Ka Executive Committee jong ka Khasi Hills Autonomous District Council (KHADC), kala rai ban wanrah noh da ka Rules ba baroh ki nongdie madan ki dei ban rejistar ialade bad ka Council bad ki bym bar Jylla kidei ban shim ia ka Trading License na ka Council.
Ia kane ka rai la shim ha ka jingialang jong ka Executive Committee ba ialam da ka NPP, kaba long hynne ka sngi Balang.
Haba kren sha ki lad pathai khubor, u Chief Executive Member (CEM) ka KHADC Bah Pyniaid Sing Syiem ula ong, ba ka EC kala rai ba ki nongdie madan kiba hap hapoh u pud u sam jong ka District Council kin hap ban rejistar noh ialade bad ka Council.
“Ki bym dei Khasi ne ki bar jylla kin hap ban shim da ka Trading License bad kin ym lah shuh ban shu shong die jingdie pathar ha ki lynti, ki rud surok bad ha kino kino ki jaka iew, jaka paidbah khamtam ki bym don ia ka License” ula ong.
Kat kum ka jingong jong u, “Kane ka rule ka long kaba donkam haduh katta katta ban pynkhlain shuh shuh ia ka Market Act kaba ngi la ioh ia ka jingmynjur na u Lat bad ia kane ka rule ngin sa wanrah ha kane ka Dorbar Tlang kaba mynta” ula ong.
Ula pyntip ba ia baroh ki jnit ki jnat jong katei ka Rules yn sa pynbna hadien ba la dep ban ioh ia ka jingmynjur na ka Dorbar jong ka Council.
U CEM ula ong ruh ba hapoh u pud u sam jong ka KHADC ki don bun bha kiba shong die madan bad kaba kham kongsan ka ba ka Council ka hap ban tehlakam ka long halor ka jingujor ha kylleng ki jaka ba ki nongshong die madan kidei kiba wan na kiwei pat ki jaka.
“Kiba bun ki jaka ha sor Shillong la shong die madan da ki briew kiba ym lah ban ithuh ithaw ba kidei naei ruh, tip ki biang ne em ia ki kot ki sla, ne jaka sah bad ym tip naei ruh ki wan bad lehse ki lad ban dei kiba wan na Bangladesh ruh, kiba wan poi na ka huri hura ha katei ka Ri. Ngi sngewkhia jur halor kane…ngim banse ban pyrkhing bad ka jingpyrrkhing kam dei eh ia ki briew ki jong ngi (Khasi) hynrei kan long ia ki briew kiba nabar kiba shu wan kamai khlem da bud ia ki kyndon jong ka aiñ Sorkar ne District Council” ong u Bah Pyniaid Syiem.
U CEM u pyntip ba ka Council kala dep iakynduh ia ka Myntri ba khmih ia ka kam pynroi Sor Bah Sniawbhalang Dhar bad ia u Myntri ka Tourism Bah Paul Lyngdoh ban pynpaw ia ka jingsngewkhia na ka liang jong ka Council ba ym dei ban ai shong dukan madan pathar ia ki briew ba nabar khlem da bishar bha shwa. Kiba bun ki briew jong ngi kiba wadkam wadjam bad wat ban shong madan ruh kim ioh hynrei ki briew kiba nabar pat kila ioh rung ban die jingdie syndon ha ka jaka sorkar kaba la ithuh syndon da ka sorkar bad ka Council ka sngewkhia bha halor kane ka mat”.
Haba kylli, u CEM ula pynshai ba ka jingbthah ia ki Khasi ruh ban rejistar ka dei namar ka jingshem jong ka Council haba ka pynlong ia ka jingkhynra ba bun ki dukan ki dei kiba shong die jingdie da ki bym dei ki Khasi hynrei kam trai pat da ki Khasi.
U CEM ula ong ba ka jingpyntreikam ia katei ka rule kan long katkum ka Aiñ Benami jong ka jylla bad ka Council kan pynshitom katkum ka aiñ ia ki Khasi kiba ai jaka rihtngen ia ki briew ba nabar.
Ula ong ruh ba ka jingai Trading License kan dei kaba bud ryntih ia ka Trading by Non Tribal Regulation 1954 ba kiba aplai kin hap ban ioh ia ka jingithuh na ka Dorbar Shnong, trai dukan ne trai jaka bad yn sa ai ia ka Trading License bad ki bym biang ia ki kot ki sla kin ym ioh satia ia ka Trading License.
, kala rai ban wanrah noh da ka Rules ba baroh ki nongdie madan ki dei ban rejistar ialade bad ka Council bad ki bym bar Jylla kidei ban shim ia ka Trading License na ka Council.){kind=link}