Pynkhreh ka India bad Maldives ban iakhun ia ka International Football ba nyngkong ha Shillong

Pynthikna u Coach ka India ban mih madan u Sunil Chhetri

Shillong, Lber 18: Ka kynhun ialehkai Football jong ka ri India kan iakhun pyrshah ia ka ri Maldives ha ka FIFA International Friendly kaban long ha ka sngi Balang ha Jawaharlal Nehru Stadium, Shillong.

Watla ka kynhun ialehkai ka ri India hapoh ka jingialam u Coach u Manolo Márquez kan pynkhreh ban iakhun pyrshah ia ka Maldives hynrei kan dei ruh kum ka jingpynhreh ban iakhun ia ka ri Bangladesh ha ka AFC Asian Cup 2027 Qualifier kaban long haka 25 tarik u Lber, kan dei ruh ka khyllipmat kaba khraw iaka kynhun jong ka ri India ban ialehkai ha Shillong, Meghalaya ha ka sien kaba nyngkong eh. Kan dei ruh ka jingiakhun kaba nyngkong ia u nongthep kol ba bun tam ka ri India u Sunil Chhetri uba la wanphai biang ban mihkhmat ia ka ri India ha ka jingialehkai football.

Haba iakren bad ki nongthoh khubor ha ka sngi baar, u Márquez ula ong, “Kadei ka sien kaba nyngkong ba ngin ialehkai hangne, hynrei nga la iatreilang bad bun ngut ki Coach bad ki nongialehkai kiba nangne. Nga tip ba kadei ka jaka kaba biang. Nga kynmaw haba nga peitkai iaka Durand Cup kaba la long ha Shillong ha u snem ba la dep, nga la ong, ba ka long kaba biang bha naduh ka madan, ki nongpeitkai bad ka jinglong jingman baroh. Ngam krenkai, nga la ong, ba shisien ka sngi kan long kaba khraw lada ka kynhun ialehkai ka ri India kan lah ban ialehkai hangne.

Katba u Defender ka ri India u Mehtab Singh ula ong, “Ngi sngewkmen ban don hapoh Shillong. Kadei ka sien kaba nyngkong ba ka kynhun ialehkai ka ri kan ialehkai hangne. Ka thain shatei lam mihngi kadei kaba la bna nam ha ka jingdon ki paidbah kiba ieid ia ka football. Ka football kadei ka jingialehkai kaba heh tam hangne. Ban rah ia ka jingialehkai football ha kylleng ki thain kadei ka kam kaba khraw ia ka jingialehkai football ha ka ri”.

U Márquez ula ong, ba kadei ka jingialehkai paralok ban pynkhreh na ka bynta ka Asian Cup qualifier hynrei ngi kwah pat ban jop ia ka jingiakhun. Ngi lah tip ia ka thong ka long ban pynkhreh bha ialade na ka bynta ban iakhun iaka jingialehkai kaba nyngkong pyrshah ia ka Bangladesh kaban long ha ka sngi baar kaban wan.

“Ngam tharai ba ngin ialehkai da ka juh ka kynhun ialehkai jong ka ri kaban iakhun pyrshah ia ka ri Bangladesh, ha ka jingiakhun kaban long lashai ka sngi. Hooid phim ym lah pat ban pynkylla ia baroh 11 ngut ki nongialehkai. Don kiban mih biang ha ka jingiakhun ha ka sngi baar. Nga don ia ka jingngeit kaba skhem ha baroh ki nongialehaki ki jong nga. Kadei ban long ka jingiakhun kaba itynnad bad ka jingpynkhreh bha na ka bynta ka Bangladesh.”

U Márquez ula pynthikna ba u Snil Chhetri yn mih ban ialehkai kaban long ruh ka sien kaba 152 ka jong u ban mihkhmat ia ka ri India.

“Kaba thikna ba Sunil yn ialehkai katto katne minit. Ngam tip yn mih naduh kaba sdang ne yn shong ben. Ngi lah ban pynmih bujli haduh 6 ngut ki nongialehkai kumta 17 ngut ki nongialehkai kin ioh ban mih iakhun bad nga tharai u Sunil un dei uwei napdeng jong kitei” ong u Marquez.

“Udei u nongialehkai ka ri India uba la thep bun kol tam ha kane ka samoi ialehkai. Kam don kano kano ka jingiapher lada u nongialehkai u don 20, 40, ne kum u parad jong nga uba la don 87. Lada ki don ha ka met kaba biang bha, kin don hangne. Ka kynhun ialehkai ka ri kam dei satia ban pynmih ia ki nongialehkai, hynrei ki nongialehkai kiba la tbit ki wan poi hangne. Ka kynhun kaba hakhmat eh kadei ban jop ia ki jingiakhun. Bad lada ngi donkam ban jop ia ki jingiakhun, ngi donkam ban khot ia ki nongialehkai kiba don ha ka met ka phad kaba biang bha” la ong u Márquez.

“Ngi lah praktis bha na ka bynta kitei ki ar tylli ki jingiakhun, ka thong kaba hakhmat eh ia ngi kadei ia ka jingiakhun pyrshah ia ka Maldives bad ia ka Qualifier pyrshah ia ka Bangladesh” la ong u Mehtab.

Ka Maldives kaba don haka kyrdan kaba 162 ha ka pyrthei kan pyndonkam ia kane ka jingialehkai paralok bad ka ri India kum ka jingpynkhreh ia ka Asian Cup qualifier pyrshah ia ka Philippines kaban long ha ka sngi baar jong ka taiew ban wan.

U Coach ka Maldives u Ali Suzain ula ong, “Ngin ialehkai pyrshah ia ka Philippines ha ka 25 tarik, kumta kadei ka jingialehkai pynkhreh na ka bynta ka jong ngi. Hynrei kadei pat kaba kongsan ia ngi namar ba ka ri India bad ka Maldives kidei ki kynhun kiba khlain ha kane ka thain. Nga kyrmen skhem ba kane ka jingiakhun kan long kaba itynnad bha. Watla ngim shim la ioh ban ialehkai bha ha ka International Level ha kine ki sngi, hynrei nga la don pat bad ki nongialehkai la bun por bha. Nga tip bha shaphang jongki bad nga tip ruh ia ka jingkhlain bad jingtlot bad kumno ban treikam bad ki. Ki nongialehkai ruh ki don iaka jingshaniah kaba skhem ha nga. Ka Maldives kadei ka ri kaba ialehkai football. Man la ki dewlynnong ki don ia ka madan ialehkai. Ngin ai ia kaba bha tam na ka bynta ki paidbah ka ri Maldives.”