Nongpoh, Risaw 07: Ka kynhun jong ki nongñiah kali ha ki surok khohruh khohram, ki lum ki wah bad ki lynti ktieh ba la tip kum ka Adventurous Hynñiewtrep Off Roaders (AHOR) hynne ka sngi thohdieng ka la pynlong ia ka lympung ñiah kali 4th AHOR 4X4 Offroad Challenge 2022 kaba saw ha khlaw jong ka Kharsati Park Umtham ha Ri Bhoi District.
La plie ia kane ka jingiakop ñiah kali da u Bah Damian Umdor, President ka AHOR ha ka jingiadonlang kiwei kiwei ki nongkitkam ka AHOR, bad la sakhi ruh ia ka jingwan poi ki samla kiba ieid ia ka kam ñiah kali ha ki surok khohruh khohram, ki lum ki wah kiba na kylleng ka ri Khasi Jaintia bad ruh napoh ka jylla Assam.
Haba kren ha kane ka sngi plie ia ka 4th AHOR 4X4 Offroad Challenge, u Bah Umdor u la pynpaw ba ia kane ka jingiakop la ju pynlong man la u snem ban ai ia ka rynsan ia ki samla kiba don sap ñiah kali ha kine ki jait surok bad kiba ieid ia kum kane ka jait sport.
Kila don haduh 27 tylli ki kali ba tip kum ki Stock Category bad 9 tylli pat ha Modified category kiba la wan ban ia shimbynta ha kane ka jingiakop kaban neh ar sngi kata ha ka 7 bad 8 tarik u Risaw.
U la iathuh ruh, ba ia kane ka jingiakop ym shem la lah ban pynlong ha u snem 2020-21 tang namar ka jingwan lynshop ka jingpang khlam COVID-19, hynrei ha u ne u snem na ka liang ka kynhun AHOR ka la shimkhia ban pynkhie im ia kane ka lympung ñiah kali.
