Shillong, K’lyngkot 30 : Ka Sorkar Jylla kala mynjur ban pynkha ia ka ‘Pla Tyngka Cooperative Society’, ka ban ai jing kyrshan kyrpad ia ki Self Help Group (SHG) ba kin pynkhlain ia ka jingsengkam ki Kynthei ha ki shnong Nongkyndong hapoh ka Jylla.
Kane ka sienjam ka dei kaba la leh da ka jingthmu ban ai ram aishah ba khlem jingeh ia ki Self Help Group (SHG) ban kyntiew ia ka jingroi ka ioh ka kot kaba neh bad ka jingshaniah halade ki Kynthei ha ka liang ka pisa tyngka.
U Myntri Rangbah Conrad K Sangma, haba pynbna ia ka jingpynkha ia kane ka Cooperative Society, ula kren shibun kiei kiei halor ka jingnang bun jong ki SHG hapoh ka Jylla.
“Ka jingdon ki SHG kala kiew na ka 4000 ha u snem 2018 sha palat 51,674 tylli mynta bad ka jingdon ki dkhot kala kiew na ka 30,000 sha ka 5.2 lak ngut ki kynthei. Ka jingpyniaid pisa jong ki SHG kala kiew na ka T.40 klur sha ka T.1000 klur ha kine kijuh ki snem” ong u Conrad.
Ka Pla Tyngka Cooperative Society, kaba nyngkong eh ka Jylla, kan treikam kum ka nongbei tyngka ia ki SHG, ka ban aibor ia ki ba kin lah ban kynshew ia ka pisa bad shim ia ka ram ka shah kaba long haduh 10 sien na kaei kaba ki kynshew khlem da donkam ban iaid ia kiba bun ki kyndon kumba long ha ki Bank.
“Kane ka Cooperatibe kam dei ka bank, hynrei kan ai ka jingshakri ha ka liang ka pisa pilain bala pynwandur kyrpang tang ia ki SHG” ong u Conrad haba bynrap ba kane ka sienjam kan pynkhlain ia ka jingsengkam sengjam ha ki jaka nongkyndong bad pynioh ia ka jingroi ka ioh ka kot ia baroh.
Ka Cooperative kan bud ia ka jingpynbeit kaba la buh kyrdan. Ki SHG, ba kynthup ia 10-15 ngut ki kynthei ha kawei ka kynhun, kin long ki nongrim, katba ki Village Organisation (VO) ki dei kiba mihkhmat ia ki SHG kiba bun. Mynta ki don haduh 5,640 tylli ki VO ha ka jylla.
Ha ka kyrdan kaba kham halor, ki Cluster-Level Federation (CLF) ryngkat lang bad ki VO kiba bun, la seng haduh 336 tylli ki CLF ha kylleng ka Meghalaya.
Ka SHG movement ha Meghalaya ka la shim ia ka bynta kaba kongsan ha kaban pynbiang ka kamai ka kajih jong ki kynthei bad pynmih kam ha ki nongkyndong. Bun ki dkhot ki la pyndonkam ia ka pisa ba la lum lang ban sdang ne pynroi ia ki kam, bei tyngka na ka bynta ka jingpule jong ki khun, bad ban im hala ka jong ka kamai.
“Bun ki kynthei mynshuwa kiba hap iaksaid ban siew bai skul mynta ki la biang ha ka ioh kakoy. Ka rukom treikam jong ka SHG ka la ai ha ki ïa ka jingshngaiñ ha ka liang ka ioh ka kot bad ka burom,” pynksan u Conrad.
Ka Meghalaya mynta kala don lang bad ka Rajasthan, Andhra Pradesh, bad Telangana kum ka jylla kaba saw ha India ban seng ia kum kane ka Cooperative Society. Ka sorkar ka la buh ïa ki thong haduh 80,000 tylli ki SHG bad T.8,000 klur tyngka ha ka pisa ba pyntyllun kam haduh u snem 2028.
 ba kin pynkhlain ia ka jingsengkam ki Kynthei ha ki shnong Nongkyndong hapoh ka Jylla.){kind=link}