Shillong, Risaw 23 : Ka Sorkar Meghalaya Democratic Alliance (MDA) kala pynkha thymmai sa ia kawei ka Community & Rural Development (C&RD) Block ha Siju, South Garo Hills District.
Kat kum ka jingpynbna (Notification) bala pynmih da ka Tnad C&RD, ia kane ka Block la pynkha thymmai ha ka 21 tarik u Risaw bad la pynhap haduh 135 tylli ki Shnong ha kane ka Block bala tip kum ka Siju C&RD Block.
U Myntri Rangbah ka Jylla dang shen, ula pynbna ia ka rai jong ka Sorkar ban pynkha ia kane ka Block ha Siju halor ka jing shem ba ka jingsahdien ka thain ka dei namar ka jingjngai palat jong ki Block ba peit ia ka thain kiba kynthup ia ka Rongara bad ka Baghmara C&RD Block.
Kane kan dei ka C&RD Block kaba 5 ha South Garo Hills bad kaba 21 ha Ri-lum Garo baroh kawei.
U Myntri Rangbah ula pyntip ba un sa leit ban plie hi dalade ia kane ka Ophis jong ka Block ba thymmai ha ka 25 tarik mynta u bnai Risaw.
U Myntri Rangbah u ngeit skhem ba da ka jingpynkha ia ka Block ha kane ka jaka kan plie lyntu ia ka jingwan jong ki kam pynroi ha kane ka thain,kaba dei ka jaka ba khring duh ia ki nongshangkai pyrthei ha Ri-lum Garo hashuwa ban shah pynjulor ha ka umsaw mynta u snem.
Ka Siju ka dei ka jaka ba mihkhmat da u Myntri Rangbah ba nyngkong eh ka Jylla u Captain Williamson A Sangma.
