Shillong, Jymmang 31 : U Deputy Commissioner ka East Khasi Hills, hynne ka sngi Thohdieng, ula pynjynsur noh ia ka hukum ba pynjari ia ka kyndon 144 CrPC da kaba pynkylla ia ka kyndon 5 jong ka CrPC ba khang ban pynlong ia ka rally jingjop (victory rally) ha ka sngi niew vote jong ka elekshon Lok Sabha la 4 tarik Jylliew.
Kane ka rai kala mih hadien ka jingialang hapdeng u Deputy Commissoner bad ki seng sain pyrthei, ki kyrtong bad ka Synjuk ki Nongsynshar Shnong ka Bri u Hynniewtrep.
Haba kren sha ki lad pathai khubor, u DC uba dei ruh u Returning Officer ka Shillong Parliamentary seat SC Sadhu, ula iathuh ba ki Seng Sain Pyrthei bad ka Synjuk ki Nongsynshar Shnong, kila pynpaw ba kim sngew iahap ban pyntreikam salonsar ia ka kyndon 144 CrPC ha baroh kawei ka District ka East Khasi Hills.
“Ngi la shim ia ka rai ban pynjynsur ia ka kyndon 5 jong ka CrPC bad ha k alai tarik ngin sa pynmih da ka hukum kaba thymmai” ong u Sadhu.
Une u Khliehduh ka District ula pyntip ba la bthah ruh ia ki seng sain pyrthei ba kin ai da ka jingthoh, ban pyntip ia ka surok ba ki mut iaid paidbah bad ha kajuh ka por ban pynthikna ruh ba kim dei ban pynmih ia kano kano ka huri hura ka ban pynthut ia ka shongsuk shongshngain.
U Deputy Commissioner ula kyntu ruh ia ki paidbah ka East Khasi Hills, ki seng sain pyrthei ba kin iatreilang bad ki bor district ha kaban pynneh ia ka shongsuk shongsain.
Haba kren sha ki nongthoh khubor hadien ka jingialang, u MLA ka VPP na Mawlai Bah Brightstarwell Marbaniang ula pyntip ba ha ka jingialang, u Deputy Commissioner ula pynbna ba ia ka kyndon 144 CrPC yn sa pynjari noh tang ha ka jaka niew vote kata ha Polo bad ki jaka ba marjan ym shuh ha baroh kawei ka District.
“Ka long kaei kaei kaba sngewtynnad ba u DC ula shim iaka rai baka jingpyntreikam iaka kyndon 144 CrPC kan dei tang ha jaka niew Votes bad ki jaka ba marjan” ong u Bah Brightstarwell.
Kumjuh ruh u Nongialam ka NPP Dr Don War ula pyntip ba jan baroh ki seng sain pyrthei kynthup ki nongmihkhmat ia ki kyrtong shimet kila pynsngew ha u DC uba dei u RO, ba kam iahap ban pynjari ia ka kyndon 144 CrPC ha baroh kawei ka District.
Ha kane ka sngi baroh ki Sengsain pyrthei kynthup ka National People’s Party (NPP), Voice of the People’s Party (VPP), United Democratic Party (UDP, Congress bad ki kyrtong shimet kila wan shim bynta haka jingialang.
