Shillong, Jylliew 24: Ki samla wadkam shipai na Jylla kila nang pynjur ia ka jingiakhih hynne ka sngi thohdieng, ban pyrshah ia ka jingpynkut shiteng ia ka Common Entrance Exam (CEE) tang namar ka jingwan jong ka skhim ‘Angipath’.
Kine ki samla kiba wan na kylleng ki District ka Jylla, kila pynlong biang da ka rally bad ka jingiashong kyllain mungor ha Nongbah Shillong ban pynrem jur ia ka jingbym lah ka Sorkar Pdeng ban pynbteng shuwa ia ka Common Entrance Exam (CEE) kaba la dep iaid shiteng, ban lah pynrung kam noh ia ki.
Kine ki samla ki dei kiba la pyndep ia ka Physical Test bad ka Medical Test naduh u snem 2021 hynrei namar ka jingwan lynshop jong ka khlam Covid-19, ki bor pyniaid ia ka eksam kila buhteng shuwa ban pyndep ia baroh ki eksam ba donkam.
Kat kum ka jingong kine ki samla, ka Tnad shipai kala pyntip dang shen sha ki ba ia ka eksam jong ki la pynkut noh namar ka jingbthah ka Sorkar Pdeng ban pyntreikam noh ia ka skhim Agnipath ha kaban pynrung kam shipai ia ki samla ka Ri.
Kane ka jingiakhih jong ki samla wadkam shipai ha Shillong kala sdang naduh ka 20 tarik Jylliew hadien ki jingiakhih kiba la pur ha kylleng ki Jylla jong ka Ri.
Kine ki samla ka Jylla kila maham ia ka Sorkar Jylla ba ki don jingthmu ban nang pynjur ia ka jingiakhih bad ban nang bun ruh ki ban iamih sha surok ban dawa iala ka jong ka hok.
