Shillong Lber 18: Ki bor pyniaid district jong ka West Garo Hills kila pynjlan ia ka jingpynjari ia ka korphiw ha ka West Garo Hills naduh ka por 6 baje mynstep jong ka 19 tarik u Lber haduh ka por 6 baje mynstep jong ka 20 tarik u Lber.
U DC ka WGH u Vibhor Agarwal ula pyntip ba katkum ka bor kaba la pynkup hapoh jongka Section 163 BNSS kumta la pynjlan ia ka jingpynjari ia ka korphiw ha ka district.
Kane ka korphiw kan sdang treikam naduh ka por 6 baje mynstep jong ka 19 tarik u Lber haduh ka por 6 baje mynstep jong ka 20 tarik u Lber tad haduh ban da pynbna kumwei pat bad ym shah ia kino kino ki briew ba kin mih na la ki iing hapoh jong ka West Garo Hills District.
Hynrei kan don pat ka jingpynjynsur ia ka korphiw naduh ka por naduh ka por 6 baje mynstep haduh ka por 6 baje janmiet jongka 19 tarik u Lber ban plie lad ia ki paitbah ban iaid ban ieng bad ban trei ban ktah.
Ha kane ka kynta pynjynsur korphiw, ki skul, ki bank, ki ophis bad kiwei kiwei ki jaka treikam ki lah ban trei kumba ki ju long.
La bthah ia ki magistrate, pulit bad ia ki ophisar hapoh ka district ba kidei ban pyrkhing ia ka jingpyntreikam ia kane ka hukum bad ban leh da kaba tyngeh pyrshah ia kito kiba pynkhein ia ka korphiw.
Kino kino kiba pynkhein kin shah pynshitom hapoh jong ka Section 123 jongka BNSS bad kiwei pat ki kyndon ain bad namar ka jinglong jingman bad ka jingdonkam kyrkieh kumta la pyntreikam mardor ia kane ka hukum.
