Shillong Iaiong 22: Ka sorkar jylla kala pynjlan ia ka por haduh ka 15 tarik u Jymmang na ka bynta ki skul SSA kiba la pyniaid da ki shnong ba kin phah ia ki no-objection certificates (NOC) ban aiti noh ia kitei ki skul sha ka tnad pule puthi ka jylla.
Ia katei ka rai la shim ha ka jingialang kaba la lum da u Commissioner & Secretary Vijay Kumar Mantri bad ki District School Education Officer (DSEO), ki Sub Divisional Education Officer (SDSEO) bad lai tylli ki synjuk jong ki nonghikai kaba kynthup ia ka Meghalaya SSA Schools Association (MSSASA), All Meghalaya SSA School Teachers Association (AMSSASTA) bad ka Meghalaya Fourth Teachers Association (MFTA) kaba la long hynne ka sngi Nyngkong.
Haba iakren bad ki nongthoh khubor u Director ka School Education Literacy Bah Banteilang J Kharshandi ula ong, “Ha kaba nyngkong kala don ka jingbuh ia ka por hynrei mynta ngi lah rai ban ai por khatduh haduh ka 15 tarik u Jymmang. Kane kadei namar ba ngi lah iohi ba kiba bun ki skul SSA kiba la pyniaid da ki shnong ki lah don bun ki jingkylli bad ki jingartatien (halor kane ka mat).”
Ula ong, ba ka tnad ia mynta hi, kala pynleit jingmut ha ki skul SSA kiba la pyniaid da ki shnong.
Ula ong ba kila don ruh ki skul SSA kiba la pyniaid da ki niam bapher bapher bad da ki riewshimet.
“Ia mynta hi ka jingpynwandur ka jong ngi na ka tnad pule puthi, kadei na ka bynta ki skul kiba la pyniaid da ki shnong. U Commissioner & Secretary ula dep pyntip ba na ka bynta kiwei pat ki skul SSA kiba la pyniaid da ki niam bad ki kynhun jong ki riewshimet, ki hap ban ai ia ka Letter of Consent da ka jingthoh, kaba mut ba kam dei ban long ha ka standard format kaban ym long kum ka jong ki skul kaba pyniaid da ki shnong” la ong u Bah Kharshandi.
U Director ula pyntip ruh ba ka jingialang kala iatai halor ka mat halor ka jingdon ryntih jong ki khynnah skul bad ula ong ba ka synjuk jong ki nonghikai kala pynpaw ia ka jingsngewkhia halor ki skul ki bym don ia ki nonghikai ne kaba bun palat ki khynnah pule hynrei kiba duna pat ha ka jingdon ki nonghikai.
“Ngi lah iatai sani bha halor kane ka mat, ngi lah sngewthuh ba ka jingbuh ryntih lang ka long ka mat kaba iar hynrei ngi hap ban bthah ia baroh ki SDSEO bad DSEO ba kin khmih bha halor kane ka kam. Kumta kaei kaba ngi lah leh mynta kadei kaba ngi peit, nuksa, ki skul sorkar, ka jingbuh ryntih ia ki nonghikai, lada ngi don ia ki nonghikai ha ka skul kaba don tang 15 ne 20 ngut ki khynnah pule, kumta ia iwei pat i nonghikai la pynkynriah noh sha kawei pat ka skul kaba don khambun ki khynnah. Kumta ngi lah peit na ka bynta ki skul sorkar bad ngi lah ban peit ruh na ka bynta ki skul SSA ruh, ngi dang peit na ka bynta ki skul SSA sha ki skul SSA” ula batai.
“Ha ki katto katne ki jingjia, ha ki khyllipmat kiba eh bha, kumta ngi lah ban wad ia ki lad ki lynti ban thung kam shipor. Ngi lah ban shu buh ia ki nonghikai SSA ha ki skul sorkar kaban long tang shipor haduh ban da la pyndep ia ka jingthung ia ki nonghikai kiba pura” ula ong shuh shuh.
U Director ula pyntip ruh ba ka sorkar ka dang iaid shakhmat ha kaban shimkhia ia ka mat halor ka jingdon bun tylli palat ki kyrdan jong ki skul.
“Katkum ka jingbthah jong ka Sorkar India, kala phaikhmat ban pynbeit ryntih ia katei ka kam baroh namar ba hangne ngi don palat bun tylli ki kyrdan jong ki skul, nalor jong ki skul sorkar bad SSA ngi don ruh ia ki kyrdan ha ka Non-Government kaba kynthup ia ki skul Adhoc, Deficit bad kumta ter ter. Mynta ngi lah iaid shakhmat bad ngi dang pyrshang ban pynbeit ryntih bad dei halor kane ka nongrim ba ngi lah leh ia kine ki kam ban shim ia ka jingsngew jong ki paidbah” ula ong bad ka bynrap, kane kadei ka kam kaba dang iaid shakhmat bad ka sorkar kan sa shim ia ka rai kaba khatduh.
Ula ong, hadien ba ka sorkar kala shimkhia bad sngap ia ka sur na kiba bun balang lyngba ka jingioh ia ka NOC ngin sa shim ia ka rai kaba khatduh ia kaei kaba ngin iaid ne leh nangne shakhmat.
 ban aiti noh ia kitei ki skul sha ka tnad pule puthi ka jylla.){kind=link}