Shillong, Nailar 07: Ka Kynhun Myntri hynne ka sngi ka la mynjur ban pynjlan ia ka jingaiwai ia ka Orchid Polo bad ka Jiva Resort ha Sohra sa 30 snem, ha kaba ki Resort kila mynjur ruh ban siew 4% na ka khajna baki ioh lum haka shi snem sha ka Sorkar.
Ka jingpynjlan ia ka jingaiwai kan long na ka bynta 30 snem bad da kane, kala pynjlan shuh shuh ia ka por aiwai sha ka 60 snem na ka bynta ka Orchid Polo bad ka Jiva Resort.
Ka Orchid Polo bad ka Jiva Resort kin siew 4% na ka jingmih baki ioh lum haka shi snem sha ka Sorkar nalor ka bai wai kaba T.5 lak man la u snem.
Ka Orchid Polo bad ka Jiva Resort mynshwa ki siew ia ka bai wai kaba T.2 lak bad T.2.48 lak man u snem.
Haba kren sha ki lad pathai khubor u Myntri Rangbah ka Jylla u Conrad K Sangma u la ong, “Hadien ba ngi la ai wai ïa kiba bun ki jaka sha ki riew shimet ne company shimet ha kaba ngi la pynjlan ïa ka jingai wai haduh 60 snem. Ka Orchid Polo bad ka Jiva Resort ruh kila kyrpad iaka Sorkar ban pynjlan iaka jing ai wais a 30 snem. Namar kata, kane ka la wan sha ka kynhun Myntri bad ka kynhun Myntri ka la peit ia kane bad ka la ai ka jingmynjur ban pynpjlan ia ka bai wai sa 30 snem tam sha ka Orchid Polo bad ka Jiva Resort bad ngi la rai ruh ban pynkiew ia ka pisa kaba ki siew sha ka 4% na ka jingmih ba ki ioh lum haka shi snem”.
“Kumta, na ka T. 2 lak bad T. 2.48 lak, mynta kin hap ban ai sa 4% na ka jingmih ba ki ioh lum haka shi snem shaka Sorkar bad ha kajuh ka por kin hap ban ai ia ka bai wai kaba T.5 lak man u snem sha ka Sorkar,” u la bynrap.
