Shillong, Lber 16 : Ka Sorkar Jylla kala pynbna ia ka rai ban pynjlan ia ka samoi treikam jong ka Garo Hills Autonomous District Council (GHADC) sa hynriew bnai hadien ba mih ki jingkulmar ka jingiakhih pyrshah ia ka jingiashimbynta ki bar jylla ha ka elekshon ka Council.
Ia kane ka rai la ai jingmynjur da ka Kynhun Myntri kaba la pyniaid lyngba ki dur khih da u Myntri Rangbah ka Jylla Conrad K Sangma ha ka sngi Nyngkong.
Haba kren sha ki lad pathai khubor hadien ka jingialang, u Symbud Myntri Rangbah ba khmih ia ka Tnad District Council Affiars (DCA) Bah Prestone Tynsong ula ong ba ka kynhun Myntri kala iakynduh ban iakren tang iawei ka mat kaba iadei bad ka jingpynjlan ia ka samoi treikam ba mynta jong ka GHADC”.
“Hadien ka jingiakren kaba bniah bad ka jingiasyllok, ka Kynhun Myntri kala rai ban pynjlan ia ka samoi treikam jong ka Council sa hynriew bnai ka ban treikam naduh ka 18 tarik Iaiong haduh ka 18 tarik Risaw, 2026” ula ong.
Ka rai kala mih tang da ki kynta hadien ba u Albinush R Marak ula hiar shuki kum u Chief Executive Member (CEM) hapdeng ka no-confidence motion bala wanrah da ki 21 ngut ki MDC ka Council.
Ha ka por janmiet, ka Iingdorbar kala jied ia u D.Ch Sangma kum u CEM ba thymmai bad thaw ia ka Executive Committee ba thymmai.
“Nga kmen ban pyntip sha phi baroh ba ha ka janmiet mynta ka sngi, ka Iingdorbar kala jied ia u CEM ba thymmai u D.Ch. Sangma” ong u Bah Prestone.
Haba kylli halor ka jingbthah ia ki kyrtong ba ki dei ban don ia ka syrnot Scheduled Tribe (ST), u Bah Prestone ula ong ba kane ka kam ka shong mynta ha ka Executive Committee ba thymmai ba kan pynbeit.
“Mynta ngi ieh ha ka jingstad jong ka EC ba thymmai ba kan shimrai halor ka kam ST lane ka kam ba iadei bad ka jingiakhun elekshon ki kyrtong la ki dei ki riewlum ne bar jylla haba phai sha ka GHADC” ula ong.
Kane ka rai kala mih ruh tang da ki sngi hadien ba ka Sorkar kala pynkynriah shuwa ia ka elekshon GHADC kaba la buh ban long ha ka 10 tarik Iaiong bad jingniew vote ha ka 14 tarik Iaiong, kaba la wan jia namar ka jingkulmar kaba mih halor ka jingpyrshah ia ki bar jylla ban iashimbynta ha ka elekshon.
U Bah Prestone ula ong ba ka jingpynjlan ba hynriew bnai kan ai bun ka por ia ka EC ba thymmai ba kan iakren bad ban shim rai ia kane ka kam syrnot ST.
“Ngi long kiba kloi. Namar phi iohi ba ka EC ba thymmai bad u CEM ba thymmai kin hap ban shim ia ka jingkitkhlieh bad wat ka Sorkar ruh kan shim ia ka jingkitkhlieh da kaba khot ia ki sha ka jingiakren….hapoh ka jingpyniaid u Myntri Rangbah ka Jylla bad ruh ha ka kyrdan jong u CEM ka GHADC namar ngi kwah ban shim lang ia ka jingmynjur jong baroh bad ban pynurlong ia ka jingangnud u paidbah” ula ong.
Haba niew ia ka rai ka Kynhun Myntri kum ka rai kaba donkam bha, u Bah Prestone ula ong “Balei ka Sorkar ka pynkynriah ia ka elekshon…ka dei namar ki jingkulmar kiba mih. Ka jingkulmar ka mih namar ka jingangnud jong u paidbah…ki iapyrshah ia ka jingiashimbynta ki bar jylla ha ka elekshon GHADC.. Kumta, kane ka rai mynta ka sngi nga tharai ba baroh ki nongshongshnong ka ri-lum Garo ki dei ban kmen”.
 sa hynriew bnai hadien ba mih ki jingkulmar ka jingiakhih pyrshah ia ka jingiashimbynta ki bar jylla ha ka elekshon ka Council.){kind=link}