Shillong, Lber 16 : U Symbud Myntri Rangbah ba khmih ia ka Tnad District Council Affairs (DCA) Bah Prestone Tynsong ula ong ba u Albinush R Marak ula duh ia ka jinglong nongialam ka GHADC namar ba ula iaid lait ia ka Executive Committee bad ia ka Iingdorbar halor ka kam syrnot Scheduled Tribe, ym namar ki rai ba iadei bad ka jingai ticket ka NPP.
“Kane ka dei kaba ju jia hi….phim lah ban ong kumta…Naba 21 ngut ki MDC kila leit hi dalade ban iakynduh ia u Lat…kat kum ka rule…u Lat ula rai ia ka jingduh jingshaniah u CEM donkam ban pynshisha hapoh ka Iingdorbar” ong u Bah Prestone.
U Marak ula hiar noh na ka shuki CEM hashuwa ban sdang ka dorbar kyrpang ka ban iakren ia ka no-confidence motion pyrshah ia u.
“Ka shuki CEM bad Chairman ka District Council ka dei kaba jied da ki dkhot ka Iing. Lada phi kwah ban weng, dei ban leh hapoh ka Iingdorbar…pynshisha ia ka jingbun paid” ula ong.
U Bah Prestone ula ong ba ka jingeh ia u Marak hi ka dei namar ka jingleh marwei halor ka kam syrnot Scheduled Tribe na ka bynta ki kyrtong ba iakhun elekshon.
“Ula pynmih hi hala ka jong ka kyrdan halor ka syrnot ST…lehse ka lah ban dei eh hynrei kam shym la iaid pat kat kum ki kyndon bala buh. Balei ba tang ma u marwei ban soi haba ia kane dei ban wanrah hapoh ka Iingdorbar?” ula ong haba bynrap “Namar kata, 21 ngut ki MDC kila ong ba pat ibit ban iai bteng ha kane ka kam”.
Halor ka jingpynduh ticket ka party, ula ong “Ka jingkyntait ne jingai ticket ka dei kaba ju jia ha man ki party. Tang namar ba ka party kam shym la ai ticket, phim lah pat ban iaid lait na ki kyndon? Phim lah satia ban leh kumta”.
 Bah Prestone Tynsong ula ong ba u Albinush R Marak ula duh ia ka jinglong nongialam ka GHADC namar ba ula iaid lait ia ka Executive Committee bad ia ka Iingdorbar halor ka kam syrnot Scheduled Tribe, ym namar ki rai ba iadei bad ka jingai ticket ka NPP.){kind=link}