Khang khyrdep ki samla pule ia ki khyrdop ban nym ioh rung u Prof Shukla
Shillong, Nohprah 02 : Ka Ministry of Education ka Sorkar Pdeng, kala pynbna ia ka shuti jong u Vice Chancellor Prof PS Shukla, ban kiar na ka huri hura kaba lah ban mih namar ka jingpyrshah jong ki kynhun bapher bapher ha NEHU ba un wan shimti biang ia ka kam.
Ka MoE kala pynjlan ia ka shuthi sha ka 13 tarik u Nohprah, pyntip u Acting Vice Chancellor ka NEHU Prof N Saha.
U Prof Shukla ula pan ia ka bor pahara kaba khlain na ka Sorkar Pdeng ba un leit shimti biang ia ka shuki Vice Chancellor ka NEHU hynne ka 2 tarik Nohphrah.
Ha ka shithi bala phah sha u Principal Secretary in-charge Higher Education, ka Sorkar India, u Prof Shukla ula ong “Ka shuti jong nga kan kut ha ka 29.11.2024, bad ngan leit shimti biang ia ka kam ha NEHU ha ka 02.12.2024”.
Ki samla pule ba dang don hapdeng ka jingiakhih ha NEHU kaba la ialam da ka NEHUSU bad KSU-NEHU Unit, kila ieng pahara ha khyrdop jong ka skulbah hynne ka step naduh ka por 8:30 baje da ka jingthmu ban pakhang lynti ia u Prof PS Shukla ba un wan rung sha campus.
Nalor kane, ki samla pule ha ryngkat ki Nonghikai, kila ialum paidbah ruh habar jong ka Administrative Block, ban ap ia ka khubor halor ka jingwan u Prof Shukla.
Haba iakren bad ki nongthoh khubor, u Acting Vice Chancellor Prof Nirmalemdu Saha ula ong ba u VC ula pynjlan ia ka shuti na ka 30 tarik Naiwieng sha ka 13 tarik Nohprah.
“Lehse, la bthah ia u ban pynjlan ia ka shuti da ka Ministry of Education namar ngam don jingtip satia. Ka Ministry lehse kala bthah ia u ban pynjlan ia ka shuti katba ka jingtohkit ka dang iaida. Namar kata, tad haduh ka 13 tarik Nohprah, un nym wan satia sha ka University” ula ong.
Kat kum ka jingong jong u, ka Committee ki arngut ki dkhot bala thung da ka Ministry ban tohkit ia ki kam ka NEHU, kan dang ban aiti ia ka kaiphod halor kane ka kam.
“Shisien bala aiti ia ka kaiphod, ka Ministry kan sa shim ia ka rai (halor kane ka kam)” ong u Acting Vice Chancellor.
La jan shibnai, ka jingshim klas kan dang ban long biang hadien ka jingiakhih ba dang bteng jongka NEHUSU bad ka KSU-NEHU Unit. Dang shen, kine ki artylli ki seng kila pynsangeh shuwa shipor ia ka jingiakhih da kaba shah thngan khlem pud hadien ba ki samla pule kila poi sha hospital na ka jingkemm tlot ka met hadien ka jingshah thngan ba 16 sngi.
Haba kylli, u Saha u pyntip ba un sa khot pynlong noh ia ka jingialang jong ka Academic Council (AC) ban shim rai halor ka jingdonkam ban sdangnoh ia ka jingshim klas.
“Nga dang iakren ia kane bad ki samla pule, to ngin peit ia kaei kaba ki ong. Ngan pyrshang ban pyn kohnguh ia ki ban sdang shim klas noh namar kane kan ktah ia ka pule dangle jong ki” ula ong.
