Agartala, Nohprah 02 : Hadien ka jingkynnoh shah thombor ki ritpaid Hindu ha Bangladesh, ka ILS Hospital, ka Hospital shimet ba hehduh ha sor Agartala, kala rai ban sangeh shipor ia ka jingai jingshakri ne sumar ia ki nongpang na Bangladesh.
Kane ka rai kala mih hadien ba ka kynhun ki samla kila leit lum hakhmat ka Hospital ha ka sngi Saitjain bad pyrta slogan kum ka “Jai Shree Ram” bad “Bharat Mata Ki Jai”.
View this post on Instagram
Kine ki samla kiba rah bad ki lama lai rong ka Ri India, kila dawa ia ka Hospital ban leh eiei pyrshah ia kaei kaba jia ha Bangladesh da kaba sangeh ban ai jingsumar ia ki nongpang kiba wan na Ri Bangladesh.
“Dei ban ai jingsneng ia ki Khun ha Bangladesh ba kin niew burom ia ka Lama jong ngi. Watla ngim bat ne buh shun ia kino kino ki jaidbynriew ne niam, ka jingjia ba mynta kala pynbor ia ngi ban shim ia kane ka sienjam” ong uwei na ki nongiakhih.
Haba shimkhia ia kane ka jingiakhih, u Chief Operating Officer ka ILS Hospital, Gautam Hazarika ula pynbna ban khang noh ia ka Bangladesh Desk ne ka miej ban ai jingshakri ia ki nong Bangladesh hapoh ka Hospital.
“Kum u Nong India, nga burom bad kyrshan ia ka jingsngew bala pynsngew da ki nongiakhih. Haba khmih ia ki jingjia ba jia ha Bangladesh, ngi la rai ban sangeh shuwa ia ka jingai jingsumar ia ki nongpang Bangladesh” ula ong haba pynpaw ba ka hospital kala sakhi ruh ia ka jingnang duna ha ka jingwan ki nongpang na Bangladesh hapoh ka Hospital.
Ka ILS Hospital ka dei ka jaka sumar ba sumar ia ki spah ngut ki nongpang na Bangladesh kiba ju wan sha Agartala manla u bnai namar ka jingjan. Ka rai jong kane ka hospital ka iasyriem ruh bad ka sienjam bala shim da ka jaka sumar ha Kolkata, kaba la pynbna ban sangeh ai jingsumar ia ki nongpang Bangladesh namar kane kajuh ka daw.
