Agartala, Naitung 06: Ka jingiakynad ka la khie ha Nandannagar Palpara ha ki bynta sepngi ka district jong ka Tripura hapoh Agartala hadien ba ka kynhun ba la tip kum ka Hindu Yuva Vahini la kynnoh ba ka la kurup ia ka jaka ba la thmu ban pynlong jaka tep briew bad pynieng da ka temple ka ba shipor.
Namar ka jingbitar halor kane ka jingjia, na ka liang ki trai shnong ki la khang ia ka lynti surok bad dawa ban pynkynriah noh mardor ia kane ka temple ba shipor na katei ka jaka.
Khnang ban tehlakam halor ka jinglong jingman, na ka liang ki bor sorkar ka Sadar sub-division ki la pynjari da ka kyndon section 144 ha katei ka jaka.
Katkum ki paid Muslim ha katei ka jaka, la ong ba la buh ia u maw mane jong u Blei Shiva ha katei ka jaka ha ryngkat ki banar jong ka Hindu Yuva Vahini Tripura Pradesh hakhmat jong ka temple.
Na ka liang ki trai shnong ki la kam ruh ba ia kane ka temple ba shipor la shna ha ka por mynmiet na ka bynta ban pynmih ia ka jingsngew iapher niam.
Uwei na ki nongiakhih pyrshah u ba la iashim bynta ha kane ka jingpakhang surok u la kam ba kane baroh ka dei ka jingiasylla jong ki mafia jaka ki ba pyrshang ban kurup jubor ia katei ka jaka mynta la bun bun snem.
Hynrei, kine ki jingpyrshang jong ki ki la shah pynpulom ha ki trai shnong. Halor kane ka bynta la ong ba ki la pyntip ruh sha ki bor sorkar ka thain, bad wat sha u myntri u ba khmih halor ka bha ka miat jong ki rit paid u Ratan Lal Nath hynrei kine ki jinglong jingman kim shym la kylla.
Watla katta ia katei ka jingpakhang surok la pynsangeh noh hadien ba ki bor sorkar ki la pynthikna ia ki nongshong shnong ban ai ka jingkyrshan ka ba pura.
