Shillong, Jymmang 15: Ka ophis u District Magistrate ka East Khasi Hills District kala pynjari da ka kyndon 144 CrPC ba mana ban sait kali, ban bret jaboh ha ki jaka ba hap hapoh ka catchment bad ka wah Umiew bad kiwei ki wahduid ba tuid sha ka.
Ia kane ka hukum la pynmih hadien ki jingpyntip sha ka ophis u District Magistrate, East Khasi Hills ba kyrpad ban leh eiei noh mardor ban tehlakam bad khang lad ia ka jingpynjaboh ia kane ka wah kaba mih na ka jingsait kali ha Umiew ha ka thain Umiew Maw-U-Sam jong ka shnong Smit, East Khasi Hills District, kaba la khang ruh da ka Meghalaya State Pollution Control Board.
Ka jingpynjaboh iaki wah bad iaki wah duid lada dang ailad ba kan iai bteng, kan pynjaboh iaka wah bad kan buh jingma iaki doh um doh pnat bad kan ym long shuh ruh ia ki briew ban dih bad ba buh jingma ia ka koit ka khiah.
Kane ka hukum kala treikam naduh mynta tad ha baroh ki jaka bala kdew haneng tad haduh da pynmih hukum da kumwei pat.
