Shillong, Risaw 09: Ka Sorkar Meghalaya bad Assam, kila pynjari da ka korphiw miet ha khappud ka thain Lapangap hadien ba mih ka jingiakynad kaba jur hapdeng ki paid Karbi bad ki Pnar, kaba lam sha ka jingiap jong uwei u Karbi.
Une u Karbi uba iap u kyrteng u Orivel Timung ba 45 snem bad ia ka met jong u, la pynkit noh sha Hamren ban leh ia ka post mortem.
Haba pynbna ia kane, u Symbud Myntri Rangbah ba khmih ia ki kam pohiing (Police) Bah Prestone Tynsong, ula pyntip bi Sorkar na ki ar Jylla kila pynbna ban pynjari da ka korphiw miet haka thain Lapangap, kaba la sdang treikam mynta ka miet.
“Ka Sorkar Assam kala dep pynjari ia ka korphiw miet ha ki thain khappud ka Assam bad ka Meghalaya ruh kan pynjari lang noh ia ka korphiw miet ha Lapangap khnang ban lah tehlakam ia ka jingiakynad” ula ong haba pynpaw ia ka jing sngewsih halor ka jingiap u briew na ka liang ka Assam.
Haba kylli, u Bah Prestone ula ong “Nga la iakren bad u Superintendent of Police ka West Jaintia Hills, uba la pyntip ba ka jingdon ki Pulit kala bun ha ka thain hynrei ula pynkhreh lypa pat ia ka kynhun lada donkam ban phah ha kano kano ka por.
U Bah Prestone ula pyntip ba ka Sorkar kala shimkhia halor kane ka jingjia bad kala don ka jingiakren hapdeng ki arngut ki Myntri Rangbah ki ar Jylla bad kumjuh ruh ki Chief Secretary, ban lah wanrah pat ia ka shongsuk shongsain.
Haba batai shaphang ka jingmih kane ka jingiakynad, ula iathuh ba ki Pulit ka Meghalaya kila leit synran ia ki nongrep na Lapangap ban leit lum leit lang ia ki marrep ha ka jingiadonlang ruh ki Pulit ka Assam. Hynrei kynsan kynsan ki Karbi kila wan ban pynthut bad kala mih ka jingiakynad kaba jur.
U Bah Prestone ula iathuh ba ka Sorkar kala bthah iau SP ba un peitngor ia kaei kaba jia ha ka thain bad ban pynjur ia ki bor pahara khnang ba kin nym mih kino kino ki jingjia ba sngewsih.
