Shillong, Risaw 31 : Ka District Magistrate ka East Khasi Hills hynne ka sngi nyngkong, kala pynmih ia ka hukum ba pynjari ia ka kyndon 144 CrPC kaba khang ia ka jingiaid rally ne procession hapoh ka Nongbah Shillong.
Kat kum kane ka hukum ka District Magistrate kala ong ba la khang ia ka jingialum ne iaid lang haduh 5 ngut ki briew na ka bynta kano kano ka rally ne procession hapoh ka Nongbah Shillong baroh kawei.
Ka hukum ka long eh ban khanglad ia kino kino ki Sengbhalang ne ki kynhun ha kaban pyndonkam bakla ia ki rally/procession ban leh ia ki kam bymman, kaba pynthut pat ia ki riew paidbah, lane kano kano ka kam kaba lah ban ktah ia u paidbah ba bun balang.
“Kano kano ka jingpynkhein ia kane ka hukum kin shah khring ha ki kyndon 188 jong ka IPC lane kino kino kiba sngew iahap” kala maham.
Kane ka jingpynmih hukum kala mkih ruh hadien ba katto katne ngut ki briew kila shah thombor bad ki kali kila shah pynjulor ha ka rally halor ka jingkyrduh kam ki samla bala pynlong da ka FKJGP.
Ia kane ka hukum kla pynmih hadien ka jingioh khubor ba ki don ki Sengbhalang ne kynhun kiba thmu ban pynlong ia kum kine ki rally ba kyndit kyndit hapoh ka Nongbah Shillong.
Ha kajuh ka por, ka bor District kala ong ba kane ka hukum kam trekam satia ia ki procession niam kiba la ioh ia ki jing bit na ki bor ba dei khmih bad kiba la kubur ban bud pyrrkhing ia ki kyndon bala buh.
