Shillong, Risaw 22 : Ka Khasi Students Union (KSU)-East Jaintia Hills ha ka sngi saitjain, kala pynieng ia ka khyrdop talasi mynder kum ka dak ban pynpaw ia ka jingpyrshah halor ka jingpynslem jong ka sorkar Pdeng ban pyntreikam ia ka Inner Line Permit (ILP) ha ka Jylla.
Ia kane ka khyrdop ILP la pynieng ha Sonapur. Ki Dkhot ka KSU kila pynlong ia ka jingkhmih bniah ia baroh ki kali ba rung sha Jylla bad ia ki kot ki sla jong baroh ki briew ba don ha kali.
Ki Nongialam ka KSU kila pyntip ba bun ki briew kim shym la lah ban batai ia ka daw jong ka jingwan rung sha Jylla hynrei kila jubab ba kin sa tip yn da kila poi ha ka jaka. Kiba bun na ki ki dei kiba leit sha Ladrymbai bad kiwei kiwei ki jaka jong ka Jylla.
Kila ong ruh ba ka KSU kam banse ban pynieng iala ka jong ka khyrdop naba ka Sorkar Pdeng ka pyni ba kam don satia ia ka mon ban pyntreikam ia ka ILP ha ka Jylla.
Ka Sorkar Pdeng kala pynslem ban ai ia ka rai halor ka Resolution bala mynjur da ki 60 ngut ki MLA jong ka Iingdorbar Meghalaya Legislative Assembly ha u snem 2019.
“Ta ka daw, ka jingtalasi bala pynlong da ka KSU ka dei ka khubor sha ka Sorkar Pdeng ba ka dei ban pyntreikam noh mardor ia ka ILP lem kumta yn pynlong ia ka jingiakhih kaba tyngeh” kila ong.
Ha kane ka jingtalasi, ka KSU kala ioh bat ruh ia ka kali ba Hyundai i20 ba kit haduh 28 kilo u Ganja, kaba don ia u registration nombor jong ka Assam (AS-11-U-7010). Lai ngut ki briew kila iadon hapoh hynrei arngut kila ioh ban phet krad katba ia u nongniah la ioh ban kem da ki Pulit ka Lumshnong Police Station lem bad ka kynhun ANTF.
Ka KSU kala shim ruh ia kane ka jingbuh khyrdop namar ha ki bnai bala leit, ha kiba bun ki khep kila lap bad ioh bat ia ki nong Bangladesh kiba wan rung tuh hapoh ka thain.
Hadien katto katne, ia kane ka khyrdop jong ka kSU la leit ban khang khyrdep noh da ki Pulit.
