Nongpoh, Rymphang 13 : Ka kynhun Young Mind Association (YMA), kaba dei kawei na ki seng trei mon sngewbha ki samla ka thain Ri-Bhoi, kala pynieng mynta da u ‘motdur’ (statue) ba shi ryngieng jong u Myntri Rangbah barim ka Jylla Dr D.D.Lapang, ban kynmaw burom ia ka synniang jong une u radbah ka sain hima sima ha Them Ri-bhoi bad ka Jylla baroh kawei.
Ia une u ‘motdur’ la pynieng ha madan jong ka Ri-Bhoi College bad la plie paidbah ia une u mot hynne ka sngi Ba-ar da u Dr.D.D.Lapang uba bat mynta kum u Chief Adviser ka Sorkar Jylla ha ka jingiadonlang u Symbud Myntri Rangbah Bah Prestone Tynsong, ka Myntri Sorkar Kong Ampareen Lyngdoh, ki MLA Bah Mayralborn Syiem bad Bah Charles Marngar lem bad kiwei kiwei.
U Dr D.D.Lapang haba ai jingkren, ula ai khublei ia ka Young Mind Association kaba la kynmaw burom ia u da kaba buh syndon da u motdur, u ban neh shirta.
Une u radbah ka kam sain pyrthei ula ai ruh ka kyntien kyntu kynpham sha baroh ki nongiashimbynta ha kane ka jingialang da kaba pynkynmaw ia ki kyntien kiba ula jied ha ka jingim jong u kaba ong “La kha ia ngi ban shakri (we’re born to serve)”.
Ula kyntu ia baroh ba kin don ia ka mynsiem jingkitkhlieh ban shakri para mynsiem briew na ka bynta ban kyntiew bad pynroi iala ka ri bad ka Jaidbynriew.
Lah ban kdew hangne ba u Dr Lapang ula sdang ia ka jingim kum u nongbylla surok bad trei shitom ban kiew haduh ka kyrdan Sub-Inspector of School. Ula shah jied kum u MLA ka Nongpoh kum u kyrtong shimet ha u snem 1972.
Hadien kane, naduh us nem 1992 haduh u Rymphang 1993, ula shakri ha ka sien ba nyngkong eh kum u Myntri Rangbah ka Jylla . Da ka jingjop biang ia ka elekshon, ula shimti biang ia ka shuki Myntri Rangbah ka Jylla ha u Lber 2003. Ula bam smai biang kum u Myntri Rangbah ha ka sien kaba lai ha ka 10 tarik Lber 2008 bad ha ka sien kaba saw ha u Jymmang 2009.
Une u Myntri Rangbah barim ka Jylla ula ioh pdiang ia ka doctorate degree na ki jaka pule bapher bapher hapoh ka Ri namar ki synniang ba ula ai sha ka imlang sahlang bad ka jingtrei shitom ha ka jingshakri jong u kum u nongmihkhmat paidbah ba da ki phew snem.
U Symbud Myntri Rangbah Bah Prestone Tynsong ula ai ka jingiaroh ia ka kynhun kaba iohi jngai ban buh jingkynmaw junom la junam ia une u riewkhraw uba la wanrah ia ki jingkylla bad ka roi ka par jong ka Ri-Bhoi District.
Ha kane ka sngi, ka Young Mind Association ka la pyni paidbah ruh iaka jingrwai kaba batai lyngkot shaphang ki kam bad ka jing shakri paidbah jong u Dr Lapang ia ka district bad ka jylla baroh kawei.
