Shillong, Naiwieng 15: Ka India Meteorological Department (IMD) kala buh ia u Automatic Weather Station (AWS) ha Mawsynram, Meghalaya, kaba dei ka jaka kaba jur slap tam ha ka pyrthei.
Ia kane ka Automatic Weather Station kan iarap ha kaban peit ia ka jinglong jong ka suiñbneng ha ka por kaba dei bad kan iarap ha kaban batai lypa ia ka suinbneng.
Ia kane ka jingplie kadei shibynta jong ka Stakeholder Workshop kaba la long hynne ka sngi Thohdieng ha ka jingrakhe ia ka jingdap 150 snem jong ka IMD ha ka jingai jingshakri ia ka ri.
Ia kane ka workshop la pynlong da ka Meteorological Centre Shillong, ia kaba la wan ban iashimbynta da ki heh ki haiñ kiba kynthup ia ka Secretary jong ka Revenue bad Disaster Management ka sorkar jylla ka Kong Matsiewdor War Nongbri bad u Director General of Meteorology, IMD u Dr. M. Mohapatra.
U Rangbah Shnong ka Mawsynram u Bah A.L. Shangpliang, ula pynpaw ia ka jingsngewnguh ia ka IMD na ka bynta ka AWS bad ia ka jingtyrwa ban don ia ka jaka khmih bniah kaba kyrpang halor ka jinglong jingman ka suinbneng bad iaka Exhibition Center kaban khring ia ki nongjngohkai bad ban ai jingtip ia ki paidbah. Ula tyrwa ruh ia ka jaka na ka bynta ban sdang ia katei ka projek, kaba pyni ia ka jingkloi jongka shnong ban kyrshan ha ka jingiaid shakhmat ha ka kam wad bniah halor ki kam kiba iadei bad ka suinbneng.
U Dr. Mohapatra ula pynpaw ia ka jingkylla jong ka IMD naduh ba la seng ia ka ha u snem 1875, ki jingkiew jongka ha kaban ai ia ki jingtip ia ka jinglong jingman ka suinbneng bad ka jingsdang ia ka “Mausamgram,” ka tiar kaban pyndonkam na ka bynta ka jinglum jingkhein ia ka jinglong ka suinbneng ha ki 10 sngi.
U Kongsan ula iaroh ia ki jingnoh synniang jong ka IMD bad ula kyntu ban pdiang ia ki jingpyndonkam jong ka ia ki lad, khamtam eh ha ka jingkhein lypa bad ban pynshong nongrim ha ka jingktah bad ki kyndon pyntip ia ka suinbneng.
Kala don ruh ka jingpyni bad ki jingiakren kiba shongsbai ha ka jingialang, ka jingkren shaphang ka jingpyniaid ia ki jingjia na ka jingwan lynshop ka bor mariang, ka rep ka riang bad ki tyllong um.
