Pdiang bat hung ia u Prof N. Saha kum u VC In-charge
Shillong, Naiwieng 16 : Ka North Eastern Hill University Students Union (NEHUSU) bad ka KSU-NEHU Unit, kila rai skhem ba kin nym pynsangeh satia ia ka jingiakhih shah thngan ba khlem pud kat bym pat weng ia u Prof PS Shukla na ka shuki Vice Chancellor ka skulbah.
“Ka jingdawa jong ki ka long kaba shai bad ka bym lah ban iapein : U Vice Chancellor Prof PS Shukla u dei ban hiar shuki, shah weng lane mih noh shirta napoh ka University” ong ka shithi paidbah jong ka NEHUSU bad KSU-NEHU Unit.
Kine ki arseng kila pdiang ia ka jingthung ia u Prof N Saha kum u Vice Chancellor In-charge, u ban shimti shipor ia ka shuki VC namar ka jingshim shuti Earned Leave jong u Prof Shukla ba 15 sngi, kaba dei rukom ban leh kat kum ka NEHU Act bad Statutes khnang ban iaid beit ki kam ki jam jong ka University.
Hynrei kila ong pat “Wat haba la thung Vice Chancellor In-charge ia u Prof N Saha ia uba ki samla pule ki pdiang kylluid mynsiem, ka NEHUSU bad ka KSU-NEHU Unit ki ieng skhem ha ka nongrim ban ieng iakhun iaka hok.
“Kane kam dei ka jingkyrpad, ka dei ka jingpynbna ia ka jingthmu. Tad haduh kane ka jingdawa kala urlong (ban weng ia u Prof Shukla) ka jingiashah thngan kan dang iai bteng bad nang jur” kila ong.
“Ka jingiakhun ia kaei kaba dei kan nang iai bteng bad ngin ym kynran dien satia. Kane ka dei ka University jong ngi bad ngin iakhun ia ka lawei jong ka” kila bynrap.
