Shillong, Naiwieng 30 : U MDC barim ka Balachanda Sofior Rahman bad 40 ngut ki briew na ki seng sain pyrthei bapher bapher hynne ka sngi Balang, kila pyniasoh ialade sha ka All Indian Trinamool Congress (AITC) ban pynkhlain ia ka Party sha ka elekshon MLA 2023 ha Jylla.
U Rahman u dei u State President barim ka Minority Morcha ka BJP Meghalaya bad u dei ruh u Nongialam barim ka NPP na Rajabala.
Ia u Rahman lem bad u Mostopha Kabor bad Abdul Jolik Sheikh la pdiang sngewbha da u Nongialam ka AITC bad MLA ka Rangsakona Zenith Sangma ha ka jingialang ba long ha ophis ka TMC ha West Garo Hills.
U Kabir u dei u nongtrei sengbhalang bad u Dkhot barim ka NPP, uba la mih aireng ruh ia ka elekshon MDC 2021 kum u kyrtong shimet na Balachanda katba u Sheikh u dei u President ka Meghalaya Muslim Welfare Association bad u nongialam ba hakhmat ka NPP na Rajabala.
Kiba la iadonlang ha kane ka jingialang ki kynthup ia ka Presient ka TMC Mahila ka Selma D Shira, u General Secretary ka TMC Meghalaya u Mukul Das bad kiwei kiwei.
