Shillong, Jylliew 23: U nongtrei monsngewbha bad riewieid mariang ma HH Mohrmen hynne ka sngi palei, ula leit pyniasoh ialade sha ka All India Trinamol Congress (AITC).
U ma Mohrmen uba dei ruh u pastor bala shongthait jong ka Balang Unitarian bad u Nongthoh article ha ka Jylla, ula pynbna ia ka rai ba un iakhun ia ka elekshon MLA 2023 na Jowai, ka Constituency kaba la mihkhmat mynta da u MLA ka NPP u ma Wailadmiki Shylla.
Haba buh jingthoh ha ka Twitter, u Nongialam ka AITC bad Chief Whip ka Liang Pyrshah Bah George B Lyngdoh ula pdiang sngewbha ia u Mohrnem bad ki Nongialam jong u sha ka party.
“Ngi pdiang sngewbha naduh ka mynsiem ia u ma HH Mohrnem bad ki nongialam jong u sha ka longing ka TMC. Ai ba un nang kiew ha ka jinglong nongialam haba bteng ban btin lynti bad ialam ia ki paidbah. Ryngkat lang ngi duwai ba u Blei un theh ia ka jingkyrkhu namar ka jingmih ban iasaid na ka bynta ki paidbah baieid jong ngi” ula ong.
