Shillong, Nohprah 29: U engineer barim ka tnat Meghalaya Electricity Corporation Limited (MeECL) bah Allan K Suchiang, hynne ka sngi palei, u la pyniasoh ialade shaka Bharatiya Janata Party (BJP) Meghalaya.
Kum ban shu pynkynmaw, u bah Allan K Suchiang u la bat teng kum u Superintendent Engineer ka tnat MeECL bad hynne ka sngi ha ryngkat ka jingdonlang ki nongkyrshan jong u, ula iasoh noh shaka BJP ha ka jingdonlang u President ka BJP Meghalaya bah Ernest Mawrie bad u Myntri Sorkar bah Sanbor Shullai lem bad u State Executive Member bad u ba khmih iaka West Jaintia Hills u Gagan Jain.
Haba pdiang burom ia u bah Allan bad iaki nongkyrshan, u bah Ernest ula ong ba ka BJP kadei ka party ka ba heh tam hapoh ka pyrthei baroh kawei bad ula kyntu ia baroh ba kin rung shaka party naka bynta ban nang pynkhlain shuh shuh iaka party hapoh ka jylla.
U bah Ernest ula ong ba u dap daka mynsiem ba kmen ban iohi ia kum ki engineer bad kiwei ki stad kiba la rung shaka BJP namar kane kan pynlong iaka party ban nang lah shuh shuh ha ka ban trei naka bynta ka bha ka miat ki paidbah khamtam haba iadei bad ka jingpynpoi iaki skhim sha man la ki tyllong ïng hapoh ka jylla.
Naka liang u bah Allan K Suchiang ula iathuh ba u ju kyrshan radbah iaka BJP bad ula kyntu ruh ia kiwei ban rung shaka party BJP kaba shim khia naka bynta ban wanrah ki kam pynroi ki ban long jingmyntoi ia baroh.
