Shillong, Naiwieng 28 : U Chief Executuve Member (CEM) barim ka GHADC Dipul M Marak bad arngut ki MDC u Sukharam K Sangma bad Albert Marak, u Nongiasaid Ain Bah VGK Kynta, R Jana Nongbeit bad kiwe kiwei, kila pyniasoh ialade sha ka Bharatiya Janata Party (BJP).
Ia kine la pdiang da u President ka BJP-Meghalaya Bah Ernest Mawrie ha ka jingiadonlang u National Secretary Rituraj Sinha, u Secretary ba khmih ia ka Meghalaya Chuba Ao, u Myntri Sorkar barim ka Jylla Bah A.L.Hek bad kiwei kiwei.
Ha ka jingkren, u Dipul ula ong ba kane ka sngi ka dei ka jingkmen ia kito kiba pyniasoh sha ka BJP namar ka dei na ka bynta ka jingmyntoi jong ki paidbah ka Jylla bad sha baroh ki District jong ka Jylla.
U Dipul ula ong ba ki paid Khasi, Jaintia bad Garo ki dei ban tip ba kila pyniasoh sha ka BJP khnang ban lah pynurlong ia ka jingphohsniew u Myntri Rangbah Duh Narendra Modi, kaba long “ka roi ka par ia baroh” ba kan urlong hapoh ka Jylla.
“Ki kam kila kylla manla ka sngi bad wat hadien ka jingioh 50 snem ka Jylla, ka Jylla ka dang duna ha kiba bun ki liang…ta ka daw khnang ban pyntyllun shakhmat ia ka Jylla, ngi donkam ban kyrshan ia ka BJP namar ka dei tang kane ka party kaba trei shisha na ka bynta ka jing bha jong u paidbah” ong u Dipul.
Haba kren ha ka jingialang, u Nongiasaid Ain Bah VGK Kynta ula ong ba ka rai jong u ban pyniasoh sha ka BJP ka long eh ban ioh ia ka rynsan ban pynsngew ia ka sur halor ki ishu bapher bapher kiba dei n aka bhynta ka bha ka miat jong u paidbah bad ka Jylla baroh kawei.
U Bah Kynta ula ong ba ki paidbah kin sa kylli ia u halor ka jingleit rung BJP hynrei u hi u sngew ba ka BJP ka dei ka rynsan kaba heh duh ban pynsngew ia ka sur namar u itynnad ruh ia ki kam jong kane ka Party khamtam ia ki kam kiba ai jingmyntoi ia u paidbah khamtam ia kiba duk ba rangli.
“Ka dei ka nongrim jong nga, ka jingkwah jong nga ka long ba lada phi kwah ban jngi, jngi ha ka duriaw ym ha ka pung ktieh naba nga niew ia baroh ki seng riewlum lane ka MDA kum ki party kiba iajngi ha ka pung ktieh” ong u Bah Kynta.
U Bah Kynta ula ong ba tad haduh mynta, ka Jylla ka dang shaniah tylli ha ka Sorkar Pdeng kaba la pyniaid da ka BJP bad kumta kum u nongkren, kan iarap bha ban pyndonkam ia ka BJP kum ka rynsan ban pynsngew ia ka sur pyrshah ia ki kam bamsap, ka pisa ba kamai bym hok (black money) na ka bynta ka bha ka miat ka Jylla.
Ula bynrap ba ka dei ka jingshisha ba ki Khasi kim ju siew ia ka khajna income tax bad dei namar kane ba ka Jylla kala don bun ki millionaire kaba ka spah jong ki kam don jingkhein.
“Nga sngew ba khnang ban long ki nongshongshnong ba don jingkitkhlieh, ka por kala dei ba ngin siew khajna khnang ban gin lahban synniang lem sha ka Ri” ula bynrap.
