Shillong, Naiwieng 29: U Myntri Rangbah ka jylla Conrad K Sangma hynne ka sngi ba-ar, u la pynpaw ba ka sorkar kan hap ban bishar iaka jingdawa pynkiew iaka bailutksan bad ai kam sorkar iaki longing ba shem lanot naka jingther kuli ki pulit Assam hapoh ka shnong Mukroh, West Jaiñtia Hills.
Lah ban kdew ba ka Kynhun Myntri Sorkar kala ai mar T. 5 lak sha ki 5 tylli ki longing jong ki briew ba khlad naka jingjia ba jia haka step 22 tarik Naiwieng ha Mukroh, West Jaiñtia hills.
Ki Kynhun bapher bapher ba kynthup naduh ki sengbhalang, ki sengsain pyrthei bad kiwei kiwei kila dawa ba ka sorkar Meghalaya ka dei ban pynkiew ka jingiarap bad kadei ban aikam sorkar ia iwei na kine 5 tylli ki longing ba shem lanot.
U Myntri Rangbah ka jylla u la ong ba ka don ka lad ban kyntiew iaka song pisa ban ai jingiarap iaki longing hynrei ia kane donkam ban wanrah jingpynkylla iaka ain kaba iadei bad kane ka kam namar iaki lad jingiarap kynthup iaka song pisa la sam sha ki lanot katkum ki kyndon ka ain.
“Haduh mynta ka sorkar kam pat iakren halor ka jingkyntiew iaka song pisa ban iarap iaki longing ba shem lanot hynrei naka liang ka sorkar kan sa rah ia kane sha ka jingialang jong ka kynhun Myntri ban iakren lada donkam ban wanrah jingpynkylla” la ong u Conrad.
U Conrad u la ong ruh ba naka liang ka sorkar kan sa shong bishar haba iadei bad ka jingdawa ai kam sorkar ia iwei na ki dkhot jong ki longing ba shem lanot naka jingjia.
