Shillong, Naiwieng 29: U National President ka National People’s Party (NPP) bad Myntri Rangbah ka Jylla Conrad K Sangma u la kren da ka jingsngewskhem ba ka jingmih noh ki 2 ngut ki MLA ka NPP kan ym don jingktah satia iaka party ha ka elekshon MLA-2023.
Haba kren sha ki lad pathai khubor u Conrad u la ong ba ka jingiamih ia rung ki nongmihkhmat, ki MLA ne ki paidbah ha ka por elekshon kan don beit bad iaka daw yn kham tip bniah hi da kito ki MLA kiba la ieh noh kam.
Kane ka jingkynthoh kala mih hadien ba arngut ki MLA ka NPP kata u Benedic R Marak ba mihkhmat ia ka Raksamgre bad ka Ferlin A Sangma jong ka Selsella, kila iehnohkam kum ki MLA ban leit pyniasoh sha ka BJP na ka bynta ka elekshon 2023.
U Conrad u la ong ba naka liang ka NPP kam khang iano iano ban mih ne wan iasoh sha ka party hynrei kane ka jingmih noh jong ki 2 ngut ki MLA ruh kam ktah satia iaka party.
“Ban tip iaki daw ba ki ieh noh kam kum ki MLA bad iaki daw ba pynlong iaka jingmih noh naka NPP, donkam ban kylli na kito 2 ngut hynrei nga ban jur ba kane ka jingphet jong ki kam ktah satia iaka party haka jingpynkhreh iaka elekshon 2023” la ong u Conrad.
U Conrad u la pynksan ruh daka ba ong ba kam don satia kata ka jingiapait ia pra hapoh ka NPP bad ka jingmih noh ki 2 ngut ka lah ban dei ba kim kwah shuh ban don bynta bad ka party.
