Nongstoiñ, Naiwieng 28: Ka Hynniewtrep Youth Council (HYC)-North West Khasi Hills District, kala byrngem ban leit ujor da ka Public Interest Litigation (PIL) sha Iingkashari Meghalaya High Court, halor ka jingkynnoh ba trei torti ia ka surok Mairang Bye-Pass ba jrong kumba 2 Km.
Kane ka jingbyrngem kala mih hadien ba ka HYC kala ioh pdiang ia ka RTI na ka Ophis u Executive Engineer ka PWD Mairang, Eastern West Khasi Hills bad ka jingleit jurip dalade ia ka jing kynnoh trei torti ia kane ka surok da ka kompani RLT Construction.
Ka HYC kala pynpaw ia ka jingsngew thamula ban iohi ba kane ka surok kaba dang shu dep shna shen, la hap ban syrdep ha ki katto katne ki jaka bala jot.
Ki Nongialam ki pyntip ba ka seng ka dang pynkhreh mynta ia ki kot ki sla ban leit ujor ia ka PIL sha ka Iingka shari haba pyntip ba kala leit iakynduh bad ai dorkhas ha u Deputy Commissioner ka Eastern West Khasi Hills hynne ka sngi ba dawa ba un tuklar lem halor ka jingleh torti ia ka kam.
Ki Nongialam ki pyntip ba u Deputy Commissioner ula shimkhia ia kane ka kam bad ula dep khot ia u EE ka PWD (Roads) bad kumjuh ruh ia ka HYC.
U pyntip ba ha ka jingiakynduh lang bad ka Seng, u DC bad u EE ka PWD kila shim ia ka rai ban leit jngoh ia katei ka surok ha ka 9 tarik jong u bnai ban wan.
